Ofi tsetseberdo na Jehovah apɛ dɛ ebusua biara mufo bɔbɔ mu ayɛ adze, mbrɛ ɔbɛyɛ a wɔnye no benya ebusuabɔ a no mu yɛ dzen na aaboa hɔn ma woeetum ayɛ kor. (Deuteronomy 6:6, 7) Iyi ntsi na Jehovah Adasefo yi ber bi si hɔ wɔ dapɛn biara mu na aama ebusua no asom abɔ mu. Wɔyɛ iyi dze nam Bible mu nsɛm a hɔn nyinara fi enyigye mu susũ ho ma ɔfa hɔn ebusua no ehiadze ho no. Sɛ wankotsee mpo na etse a, dɛm aber yi yɛ hokwan a oye paa a ibotum dze esũa Bible ho nwoma bi a eyi esi hɔ, na ama eetum atwe epin anaa abɛn Nyankopɔn.

Ɔyɛ aber a wɔdze twe pin Jehovah. “Hom ntwe mpin Nyankopɔn na ɔbɔtwe epin hom.” (James 4:8) Sɛ yesũa Jehovah no suban nye ne ndzeyɛɛ ho adze kɔ ekyir wɔ n’Asɛm Bible no mu a, ɔma yehu no yie ankasa. Ɔkwan a ɔyɛ mberɛw a hom botum afa do ahyɛ hom ebusua som ase nye dɛ hom dze ber no bi bɔbɔ mu akenkan Bible no dzen. Sɛ ɔbɛyɛ yie a hom ndzi dapɛn dapɛn Bible akenkan ho nhyehyɛɛ a wɔayɛ ama Asɛnka Nye Asetsena Nhyiamu no ekyir. Hom botum etwa akenkan ne fã bi ama ebusua no munyi biara, na afei hom nyinara botum esusũ esũadze a hom enya efi Kyerɛwnsɛm no mu no ho.

Ɔyɛ ber a ebusua no mufo dze bɛn hɔnho. Sɛ kun na yer, anaa awofo nye hɔn mba, sũa Bible no bɔ mu dɛ ebusua a, ɔhyɛ hɔn ebusuabɔ no mu dzen. Ɔsɛ dɛ ɔyɛ enyigye nye asomdwee ber a ebusua no mufo nyinara hwɛ kwan wɔ dapɛn no mu. Awofo botum ahwɛ mfe a hɔn mba edzi na wɔaapaw nsɛntsir ahorow bi a ɔfa hɔnho. Hom botum apaw nsɛm no bi efi The Watchtower nye Awake! no mu, anaa hɛn wɛbsaet, jw.org do. Hom botum esusũ ɔhaw a hom mba hyiae wɔ skuul no ho, nye mbrɛ wobesi egyina ano. Ebɛnadze ntsi na hom nnhwɛ hɛn dwumadzi a woyi wɔ JW Broadcasting (tv.pr418.com) do no bi, na sɛ hom wie a hom eesusũ ho? Hom botum so esũa ndwom a wɔbɔtow wɔ asafo nhyiamu ase na sɛ hom wie ebusua som no a, hom dze biribi akekã hom ano dze agye hom enyi.

Dɛm ber tsitsir yi a hom bɔbɔ mu asom dapɛn biara no bɔboa ebusua no mufo nyinara ma hɔn enyi agye Nyankopɔn Asɛm ho, na obehyira hom mbɔdzembɔ no do kɛsenara.​—Ndwom 1:1-3.

• Ebɛnadze ntsi na yeyi ber bi si hɔ dze yɛ ebusua som?

• Awofo bɛyɛ dɛn etum ama ebusua som ase ayɛ enyigye ama ebusua no mufo no nyinara?