7 JANUERI, 2022
ALBANIA
100 na Yabaki na Vunautaki ni iTukutuku Vinaka e Albania
Na yabaki qo me ika100 ni yabaki ni nodra tiko e Albania na iVakadinadina i Jiova.
O Nasho Idrizi e imatai ni iVakadinadina i Jiova e Albania. Ena itekitekivu ni 1920, a vulica na iVolatabu e Merika vei ira na Gonevuli ni iVolatabu, na yaca era kilai kina ena gauna ya na iVakadinadina i Jiova.
Ena 1922, a lesu o Nasho i Albania. Toso na gauna era vulica tale ga na iVolatabu eso tale na kai Albania era tiko e Merika, ra qai lesu ina nodra vanua mera lai wasea kina na ka dina.
Thanas Duli
E kaya o Thanas Duli e dua vei ira na Gonevuli ni iVolatabu e Albania: “E tolu ga na ivavakoso e Albania ena 1925, ra qai tu yawa tale ga eso na Gonevuli ni iVolatabu kei ira na tataleitaki.”
Gauna qori e vakadewataki e levu na ivola ena vosa vakaAlbania, me vaka The Harp of God kei na A Desirable Government. E vakamacalataka na Watch Tower ni Tiseba 1 1925, “e veisoliyaki e levu na ivola vakaAlbania vei ira na lewenivanua, ra qai marautaka nodra mai kila na ka dina.”
Argjiro kei Nasho Dori
Era dau vakatokai na iVakadinadina i Jiova vei ira na lewenivanua e Albania me ungjillorë, e kena ibalebale “daukaulotu,” nira gugumatua ena nodra cakacaka vakavunau. E kaya o Nasho Dori, a papitaiso ena 1930: “Ena 1935, e le vica keitou sauma e dua na basi me keitou vunau ena tauni o Këlcyrë. Oti qori keitou tuvanaka e dua na ilala levu mera veitomani ena cakacaka vakavunau e Albania. Keimami vunau ena tauni o Përmet, Leskovik, Ersekë, Korçë, Pogradec, kei Elbasan. Keimami vakaotia neimami cakacaka ena tauni o Tirana, qai veidonui sara ga kei na siga me vakananumi kina na Mate i Karisito.”
Ena 1939, e lewai Albania na Matanitu o Itali qai vakatabuya nodra cakacaka na tacida. Era vakacacani nira tawaveitovaki ra qai sega ni via curu ena mataivalu. a Ratou biu e valeniveivesu e 15 na tacida. E kau o Brother Nikodhim Shyti ina keba ni veivakacakacakataki, qai sega ni rogoci tale e dua na itukutuku me baleti koya.
Ni vakarau cava na iKarua ni iValu Levu, sa lewai Albania tu ena 1944 na veiliutaki Vakominisi. E sega ni cegu nodra vakacacani na tacida, e levu era vesu ra qai vakararawataki. Eso tale era kau ina keba ni veivakacakacakataki, ra qai yawaki ira nodra vuvale. E sega ni vakatarai ena gauna qori me dua me gole i Albania. E vakamacalataki ena iVolaniyabaki vakavalagi ni iVakadinadina i Jiova ni 1959: “Era sega ni vakatara na iliuliu ni matanitu e Albania mera veimaliwai na tacida, ia e sega ni tarova qori na veivuke ni yalo tabu ni Kalou vei ira.” Ena 1967, o Albania e imatai ni matanitu me tarovi kina na sokalou. Ia era qaqarauni tiko ga na tacida ra qai dei ena vakabauta.
Ni cava na veiliutaki Vakominisi, era vakadonui tale vakalawa na iVakadinadina i Jiova e Albania ena ika22 ni Me 1992. Qori ni oti e sivia ni 50 na yabaki nodra vakatatabutaki tu.
Gauna qo, sa 5,550 na mataveitacini era tiko e Albania, ra qai veiqaravi tiko ena 89 na ivavakoso. Dina nira vakacacani na tacida e Albania, ia eda marautaka vata kei ira na nodra ‘gumatua ni vunau e tete sara kina vakalevu na vosa i Jiova.’—Cakacaka 19:20.
a Qo na nodrau veivaluvaluti o Kirisi kei Itali me tekivu mai na ika28 ni Okotova 1940 ina ika23 ni Epereli 1941. Na ivalu qori era sasaga kina na matanitu ena cevaicake kei Urope me tekivu kina na iKarua ni Valu Levu.
