Dua na gauna wale tiko ga qo, e kurei Albania e dua na uneune. Qo na uneune kaukaua duadua me yaco ena loma ni 40 na yabaki. E sega ni dua na tacida e mate se mavoa, ia e vakacacani e 35 nodra vale, wili kina e 3 na Vale ni Soqoni.

Ena ika26 ni Noveba, 2019 e kurei Albania na uneune e rauta ni 6.4 na kena kaukaua. Era mate e le 51, mavoa e sivia na le 3,000, era tokitaki tale ga e vica vata na udolu na lewenivanua. O ira na tacida era tokitaki mai na vanua qori era sa tiko kei ira na wekadra, kei ira tale ga na tacida ena so tale na ivavakoso. Na ivavakoso e vakacacani nodra Vale ni Soqoni era soqoni tiko ena Vale ni Soqoni e sega ni vakacacani.

E kaya e dua na qase ni vavakoso na yaga ni nodratou vakavakarau vakavuvale ena leqa tubukoso: “Gauna e yaco kina na uneune, totolo ga neitou taura neitou kato, keitou cici i tuba. Na kato qori e tiko kina na iyaya me vakayagataki ena gauna ni leqa ni tubukoso, me vaka na itutuvi, wai, wainimate kei na kakana. Keitou vakavinavinakataki Jiova kei na iLawalawa Dauvakatulewa, ena nodratou loloma kei na nodratou kauaitaki keitou.”

E totolo tale ga nodra veivuke na ivakatawa ni tabacakacaka ena nodra vakatawani, ra vakayaloqaqataki tale ga na tacida era vakaleqai. Rau tokitaki tale ga e dua na ivakatawa ni tabacakacaka kei na watina ni vakacacani nodrau vale. Ia na ituvaki dredre qori, rau se vakayaloqaqataki ira tiko ga eso tale.

Era sikova tale ga na tacida ena Komiti ni Tabana na vanua e vakacacani vakalevu. E tauyavutaki tale ga e dua na Komiti ni Vakacoko me vukei ira na tacida.

Meda nanumi ira mada ga ena masu na tacida e Albania mera vosota na ituvaki dredre qori. Eda rai vakanamata tu ena noda inuinui ena gauna se bera mai, ni na sega tale na leqa tubukoso.—Roma 8:25.