Ena ika21 ni Noveba 2021, e sevutaka o Brother Eric Raffaeli, e lewe ni Komiti ni Tabana e Angola, na New World Translation of the Christian Greek Scriptures ena vosa vaKimbundu. E sevutaki ena iyaya vakalivaliva, ena qai veisoliyaki na kena ilavelave tabaki ena 2022. E katoni na kena porokaramu ra qai sarava ena internet e rauta ni le 11,000.

Ena 1920, e vakatabuya na matanitu e qali kina o Potukali me vakayagataki e koronivuli na vosa vaKimbundu kei na so tale na vosa vaka-Aferika. Nikua, era vosataka na vosa vaKimbundu e rauta ni 1.7 na milioni na lewenivanua e Angola, kei ira era tiko ena koroturaga o Luanda. Qo e dua vei ira na vosa e vosataki vakalevu e Angola.

Tekivu ena 1990 sa tabaki na noda ivola na iVakadinadina i Jiova ena vosa vaKimbundu. E qai tauyavutaki ena 2008, na imatai ni ivavakoso vosa vaKimbundu. Nikua, sa tiko e 55 na ivavakoso vosa vaKimbundu, ra qai veiqaravi kina e 2,614 na dautukutuku.

Ni vakatauvatani kei na vakadewa makawa, levu na dauwiliwili era kaya ni matata cake sara na vakadewa vou ni iVolatabu qo. Kena ivakaraitaki, na vakadewa makawa ni Maciu 5:3 e kaya: “Era kalougata na dravudravua vakayalo.” Ia na vakadewa ni New World Translation e kaya: “Era marau o ira era kauaitaka nodra bula vakayalo.”

E kaya e dua na daunivakadewa: “Au kila ni na yaga vakalevu na iVolatabu qo vei ira na tacida era vosa vaKimbundu. Ena vukei ira mera volekati Jiova nira vakayagataka ena nodra vuli vakataki ira kei na cakacaka vakaitalatala. E ka dokai vei au meu vakaitavi tu vakalailai ena vakadewataki ni iVolatabu qo. E laurai kina ni Kalou dauloloma o Jiova.”

Eda kila ni na yaga vakalevu na iVolatabu qo vei ira na tacida mera vukei ira na tataleitaki me rawa nira “kila na veika vuni ni Matanitu ni Kalou.”—Luke 8:10.