Ena ika23 ina ika28 ni Julai 2024, e vakayacori e dua na soqo me baleta na veika vakabisinisi e vakatokai na 39th Luanda International Fair mai Luanda, e Angola. E caka kina e voleka ni 1,800 na vanua ni sarasara qai voleka ni 100,000 na vulagi era lai sarasara kina. Era vakarautaka na mataveitacini e dua na vanua (booth) me vakaraitaki kina na ivola vakaivolatabu ena ciwa na vosa. E vakarautaki tale ga na vanua mera dabe kina na vulagi me rawa nira vulica na iwalewale ni caka na vuli iVolatabu. Ni caka tiko na sarasara, e vakaraitaki vaka227 na iwalewale ni caka vuli iVolatabu qai sivia ni le 100 era vinakata mera sikovi ena nodra vale.

E gole e dua na marama ina vanua ni sarasara qai kaya vua na tacida yalewa a tiko i kea ni via kila eso tale na ka me baleta na iVolatabu. E mani sureti koya sara na tacida yalewa me vulica na iVolatabu. Ni rau veitalanoa tiko, e taroga na marama qori e levu na taro qai taleitaka na ka e yalataka na iVolatabu me baleta na gauna se bera mai. Gauna qo, sa marautaka tiko nona vuli iVolatabu kei na tacida yalewa.

Dua tale na marama e kurabuitaka ni sega ni saumi na noda veivakavulici ena iVolatabu. E vakamacalataka sara vua e dua na tacida yalewa ni noda inaki meda wasea na itukutuku vinaka vei ira na tamata kece. E kaya na marama qori ni a vulica tu na iVolatabu ena dua na gauna. E mani vakaraitaki sara vua na vidio, Na Cava e Caka ena Vale ni Soqoni? E marautaka ni kila ni dola raraba na soqoni vei ira na lewenivanua, qai vinakata me kila e levu tale na ka.

A tiko tale ga ena vanua ni sarasara e dua na yalewa mai Potukali qai marau ni raici ira na mataveitacini. E vakamacalataka sara ni dau veitalanoa tiko kei na dua rau tiko veitikivi e iVakadinadina i Jiova tale ga. E kaya: “Au dau qoroya na nomudou isoqosoqo, au via kila tale ga e levu tale na ka!” E mani kaya sara na yalewa qori ni gauna ena lesu kina i nona vale ena kerea na marama rau tiko veitikivi me vakavulici koya ena iVolatabu.

Eda marau ni levu era vinakata mera kila eso tale na ka me baleta na iVolatabu e Angola. Era yalorawarawa tale ga ni ciqoma na veisureti i Jiova mera mai “gunuva wale na wai ni bula.”​—Vakatakila 22:17.