Ena ika3 ni Epereli 2024, e dola e dua na vanua ni sarasara e vakatokai na “Purple Triangles: A Story of Courage and Resilience,” ena Holocaust Museum e Buenos Aires, e Argentina. Ena dola tiko me yacova na ika4 ni Okosita 2024.

Donuya nona veiliutaki o Itala, e sivia na 16,000 na iVakadinadina i Jiova era vakacacani nira tawaveitovaki. E rauta ni 4,500 era kau ena keba ni Nazi, ra qai vakamatei e rauta ni 1,750. E cula ena nodra isulu na tikinisulu lokaloka (purple triangle).

E wasei vakatolu qai vakaraitaki kina na itukutuku makawa, kei na ka sara ga era dui sotava na iVakadinadina i Jiova e vakavotuya na nodra yalodina kei na nodra yaloqaqa ena vanua e veiliutaki kina o Itala. E vakarautaki na katokatoni kei na iyaya vakalivaliva, kei na vica na vidio ena vosa vagalu vakaArgentina, vosa vakavalagi kei na vosa vakaSipeni. Era tiko tale ga na dauveivakasarasarataki vei ira na vulagi.

E vakaraitaki tale ga kina e dua na kopi ni ivola era vakayagataka na veiliutaki i Itala mera vakamalumalumutaka na nodra yalodina na iVakadinadina. Era dau vakaukauataki mera sainitaka nira sa biuti Jiova kei ira nona tamata. Ke ra cakava qori era sa na sereki kina. E vica ga na iVakadinadina era saini kina. Era sureti e levu na lai sarasara yani mera raitayaloyalotaka na ka sara ga era sotava na iVakadinadina i Jiova, me vaka sara ga era tiko kina. E soli vei ira na ivola mera sainitaka, ra qai uqeti mera vakasamataka na kena vinakati na yalodina kei na nuidei mera kua kina ni saini.

E lai sarasara kina o parofesa Isabel Burnstein, e dauvakadidike ena ka me baleta na veivakararawataki ena veiliutaki i Itala e kilai me Holocaust. Qo na ka e kaya ni sarasara oti. “Na veika e vakaraitaki kina e vukei keimami na lai sarasara me keimami kila na nodra tutaka na iVakadinadina i Jiova na nodra vakabauta, ra qai digitaka ga na ka e dodonu. Eda bula tu qo ena vuravura sa sega ni kauaitaki kina na ka e dodonu, ia na nodra italanoa e uqeti keimami me keimami yaloqaqa ni cakava na ka e dodonu qai yaga.”

Me tekivu mai na kena dola, era lai sarasara kina e sivia na 8,400 na vulagi. E kaya o Brother Marcos Donadío, na mata ni iVakadinadina i Jiova e Argentina: “Vei ira na sega ni kilai keimami vinaka na iVakadinadina i Jiova, na veika e vakarautaki qo era na kila vinaka sara na keimami itukutuku kei na neimami vakabauta. Dua na ka na neimami marau, keimami nuitaka tale ga ni levu era na mai sarasara.”

Eda vakavinavinakataka na kena vakarautaki qo me vakavotui kina nodra yaloqaqa, kei na nodra yalodina na tacida. Me uqeti keda mada ga na nodra ivakaraitaki meda “dei me yacova na iotioti.”​—1 Korinica 1:8.