Ena ika6 ni Epereli, 2024, a vakatabui kina na valenivolavola ni tabana e Buenos Aires, Argentina, e solia na ivunau o Brother Jeffrey Winder, e lewe ni Lawalawa Dauvakatulewa. E voleka ni 500 na mataveitacini era tikova na porokaramu ni vakatabui ena tolu na vale ni soqoni lelevu ena itikotiko vou e Peceli. Era qai sema mai ena porokaramu ni vakayagataki na iyaya vakalivaliva e lewe 5,844 ena Vale ni Soqoni Lelevu volekata na siti o Ezeiza. Ena siga tarava, a vakayacori na soqo lavotaki ena Vale ni Soqoni Lelevu, qai kaburaki ena ivavakoso kece e Argentina kei Uruguay, e kedra iwiliwili kece era lewe 181,643.

E tuvanaki vei ira na vulagi mera lai sarasara ena vale ni volavola vou, ra marautaka na veimaliwai, qai vakaitavi ena so tale na ka. E okati kina e sivia ni 230 na tacida mai na 25 na veimatanitu. O Brother Sergio Spaccasassi e veiqaravi tiko qo e Ecuador, e veitokoni na kena taravaki na vale ni tabana vou Argentina. E kaya me baleti ira na mataveitacini mai veiyasai vuravura era tikova na soqo ni vakatabui ni valenivolavola: “E dau vakayagataka o Jiova na soqo lavotaki va qo meda veivolekati kina vakamataveitacini qai sokaloutaki koya vata.”

E kaya o Brother Juan Carlos Nigro, e lewe ni komiti ni vale ni tabana e Argentina: “Keimami raica sara ga na nona veidusimaki o Jiova qai vakalougatataka na tarataravaki qo. Koya ga e vakarautaka mai vei keimami na vale totoka qo me vakalagilagi kina na yacana.”

Keimami vakavinavinakataki Jiova na mataveitacini kece e Argentina, o koya e ‘cakava na ka kece me rairai vinaka ena kena gauna,’ me baleta na valenivolavola vou qo.​—Dauvunau 3:11.