Ena ika11 ina 21 ni Noveba 2022, e vakayacori ena siti o Rosario e Argentina e dua na soqo e vakatokai na National Festival of Immigrant Communities. Era tiko kina e sivia e 1 na milioni. E vakaraitaki ena soqo qo na nodra ivakarau vakavanua na duidui matatamata era tiko e Argentina. E tuvanaka na valenivolavola ni tabana e Argentina na vunau lavotaki me vakayacori ena soqo. E veisoliyaki na noda ivola vakaivolatabu qai vakamacalataki vei ira na vulagi na noda website na jw.org. E tu kina na noda ivola ena vosa vagalu ni Argentina, vakavalagi, vakaJaina, vakaGuarani, Haiti Creole, vakaPotukali, vaQuechua (Bolivia) kei na vosa vakaSipeni. Era vakaitavi kina e sivia ni 400 na tacida.

E vakadonui me biu na noda qiqi ni vunau ena vanua era lakova vakalevu na vulagi ena soqo. E kaya e dua na vakailesilesi ni siti: “E maqosa na kemuni irairai qai veidokai na nomuni itovo.” E gole yani ina dua na qiqi e dua na vuniwai ni mona qai kaya: “Au dau marautaka vakalevu na nomuni ivola. Au dau solia vei ira na tauvimate au qarava.”

Ena ika14 ni Noveba 2022, e tabaki ena dua na niusiveva e dau wiliki vakalevu ena siti o Rosario, e dua na ulutaga me baleta na vunau lavotaki. E okati tale ga kina na link ni noda website na jw.org qai vakamacalataka na iwiliwili ni vosa e sa vakadewataki kina.

Eda marautaka nira vakaitavi ena gauna veiganiti kece ga na mataveitacini e veiyasa i vuravura mera “vunautaka vakavinaka sara na itukutuku vinaka.”—Cakacaka 20:24.