Ena ika20 ni Me ina ika11 ni June e vakayacori e Argentina na sotasota levu ni qito soka (FIFA U-20 World Cup). Ena loma ni tolu na macawa, era lai sarasara kina e sivia na le 400,000 e Argentina kei ira mai vanuatani. E tuvanaki na gauna kei na vanua me lai biu kina na noda qiqi ni vunau ena vanua ni sara qito. Era vakaitavi kina e voleka na 500 na tacida qai ra veisoliyaka e sivia na 500 na noda ivola. Era vukei e levu mera rai ena noda website na jw.org me saumi vakaivolatabu na nodra taro.

E gole e dua na turaga ina dua na noda qiqi qai kaya ni dau taleitaka me vakarogoca na katokatoni ena gauna e vakaukaua yago tiko kina. E vakaraitaka vua e dua na tacida tagane na noda katokatoni ena jw.org qai vakamacalataka na sala me na download kina. E kaya na turaga ya ni na rogoca tale ga na katokatoni ni noda ivola.

Me vaka ni levu na vulagi era gole mai vanuatani, era biuta na tacida na ivola ena qiqi ena 9 na vosa. Era vulica tale ga na dautukutuku na vosa ni vakabula ena duidui vanua mera kidavaki ira kina vulagi era gole yani ena qiqi. E kaya e dua na tacida tagane: “Niu raica na sasaga e caka me rawa nida vunau vei ira na duidui vosa au vulica kina na loloma kei na nona sega ni dauveivakaduiduitaki o Jiova. E vakamarautaki au sara ga qori.”

Eso na vanua ena rara ni qito, e sega ni dau vakatarai vei ira na lewenivanua mera soqoni kina. Ia e vakasakiti nira vakadonui na tacida mera biuta kina na nodra qiqi ni vunau. E kaya e dua na vakailesilesi ena vanua ni qito: “Keimami kila nira dau muria na lawa na iVakadinadina i Jiova, ena sega gona ni leqataki nodra tiko ena vanua qo.” Qori e dua na ivakadinadina levu vei ira na tabana ni tataqomaki.

E veiuqeti nida raici ira na dauveiqaravi i Jiova era saga vagumatua mera vunau vei ira na tamata kece ga qai kaburaka na sore ni ka dina e veiyasa i vuravura.—Dauvunau 11:6.