Ena Janueri ina Epereli 2023, e tuvanaka na valenivolavola ni tabana e Argentina, na cakacaka vakavunau lavotaki ena veivanua yawa e Argentina kei Uruguay. Era vakaitavi kina e sivia na 9,500 na dautukutuku qai tuvanaki e voleka na 700 na iwasewase lalai. Era veivuke ena 146 na ivavakoso e tu ena veivanua yawa ena yalava e qarava na valenivolavola ni tabana.

Era tiko e sivia e dua na milioni na lewenivanua ena tauni lalai, veikoro, kei na veivanua yawa e Argentina kei Uruguay. Ena tolu na yabaki sa oti, e dredre na nodra gole na dautukutuku ena yalava qori. Ia era marau na tacida mera lai wasea kina na itukutuku ena iVolatabu.

Rau gole o Brother Adrián Donadío kei watina o Karina, me rauta na 1,600 na kilomita me rau yaco ena vanua me rau vunau kina e Tartagal e Argentina. E kaya o Adrián: “Ni keirau raica na levu ni nodra via vulica na veika me baleta na Kalou, e uqeti keirau sara ga me keirau vakayaloqaqataki ira ena itukutuku vinaka.”

Rau sikova e dua na veiwatini qase e rua na dautukutuku ena tauni o Barrancas e Argentina. Rau sa yabaki 90 vakacaca, qai rau vulica na iVolatabu ni bera na matedewa. Rau sega ni veitaratara tu kei ira na tacida me tolu na yabaki, ni yawa nodrau itikotiko qai dredre na Internet. Ia rau tomana tiko ga na nodrau wili iVolatabu e veisiga qai masuti Jiova me dua e sikovi rau yani. Dua na ka na levu ni nodrau marau ni rau sotavi rau na tacida ena gauna ni cakacaka vakavunau lavotaki. Rau vakavinavinakataki Jiova ni sauma na nodrau masu qai tuvanaki me tomani tale nodrau vuli.

Rau painia tudei o Brother Eduar Ferreira kei watina o Alejandra. Ratou gole vakaveitamani me 400 na kilomita me ratou vakaitavi ena cakacaka vakavunau lavotaki. Ratou yabaki 17, 15, kei na 11 na luvedrau. E kaya o Eduar: “Keirau marau ni keirau raica nodratou taleitaka na gone me ratou vakaitavi tale ga. Keitou sa tu vakarau vakavuvale me keitou na vakaitavi ena vunau lavotaki tarava!”

Eda marau nida raica nona vakalougatataka o Jiova na nodra sasaga na tacida era gu mera ‘vunau sara vakavinaka’ ena veivanua yawa.—Cakacaka 10:42.