Era vakaitavi na tacida ena dua na cakacaka vakavunau lavotaki mai na ika6 ni Okotova ina ika18, 2018, donuya nodra qito na itabagone na 2018 Summer Youth Olympic Games, a vakayacori mai Buenos Aires, e Argentina.

Era vakaitavi ena qito qori e sivia na 4,000 na dauqito mai na 206 na vanua. Qo na qito levu duadua era dau vakaitavi kina na itabagone mai na yabaki 15 ina 18. Mera rawa gona ni rogoca na dauqito ena veivanua qori na itukutuku vakaivolatabu, era vakaitavi ena vunau lavotaki qo e sivia na 6,400 na iVakadinadina i Jiova. Era tuvanaka me 390 na qiqi me vakaraitaki kina noda ivola ena rauta ni 100 na dui vanua.

Na qito qori e vakatabakidua sara ga vei ira na itabagone, era vakarautaka kina na tacida na rua na ivola, Questions Young People Ask—Answers That Work vaka kina na brochure, iSau ni 10 na Taro Era Taroga na iTabagone. Levu na vosa e soli kina na ivola vakaivolatabu okati kina na vosa vakaArame, vakaJaina, vakaValagi, vakaVaranise, vakaJamani, vaKorea, vakaPotukali, vakaRusia, vakaSipeni kei na vosa vagalu ni Argentina. E rauta ni 800 na ivola e soli e veisiga.

Era marau na tacida era vakaitavi kina mera tukuna na itukutuku nuitaki vakaivolatabu vei ira na gone kei ira na qase.—Same 110:3.