Ena ika14 ni Janueri 2024, sa ika10 ni yabaki ni kena tauyavu na tabana ni veiqaravi raraba e Armenia. Na ituvatuva qori e rawa kina vei ira na tacida era sega ni curu ena mataivalu mera vakaitavi ena so na tabana ni veiqaravi ena nodra itikotiko. Na cakacaka qori e okati kina na tarataravaki, qaravi ni lomanibai, vakatorocaketaki nodra bula na lewenivanua kei na so tale. Tekivu mai na gauna e tauyavu kina, e sivia ni le 450 na tacida cauravou era vakatulewataka mera vakaitavi ena cakacaka qo.

Gauna qo o Brother Samuel Petrosyan e dau qarava na lomanibai. E kaya: “Au dau saga meu solia noqu vinaka kece ena ka au cakava. Kena ivakaraitaki, au na saga meu vakaotia vinaka noqu itavi, qai dina ena ka kece. Niu cakava qori era dokai au kina na noqu supavaisa, era yalovinaka tale ga vei au.”

O Brother Artur Martirosyan a veiqaravi tu e valenibula me tolu na yabaki. E kaya: “Au vakavinavinakataka ni rawa niu vukei ira na vinakata na veivuke. E vukei au tale ga meu bucina eso na itovo vinaka. Au vulica meu yalorawarawa vakalevu, vosota na nuiqawaqawa qai dau veivosaki vinaka.”

Ni bera na 2014, era vesu vakabalavu na tacida cauravou e Armenia nira sega ni via vakaitavi ena ivalu. Qo na ka e kaya e dua na vakailesilesi me baleta na yaga ni kena caka na ituvatuva qo e Armenia: “Au sega ni duavata ena gauna a tauyavu kina na ituvatuva qo, baleta niu vakasamataka na lawa ni matanitu qai rawa tale ga ni vakayagataki vakaveitalia. .  . . Ia e cala na noqu nanuma. Oti e vica vata na yabaki au raica . . . nira sega ni vakaveitaliataka na lawa ni matanitu na iVakadinadina i Jiova ena gauna era cakacaka kina. Era cakacaka ga vagumatua ena dui tabana era lesi kina. Au vakavinavinakataka vakalevu na tabana ni veiqaravi qo.”

E kaya tale ga e dua na lewe ni komiti ni Republican Committee on Alternative Service: “Sa tini qo na yabaki na kena tauyavu na ituvatuva ni veiqaravi qo e Armenia . . . Keitou rawa ni kaya ni qo e dua na vakatulewa vinaka duadua e cakava na matanitu o Armenia. Ni dikevi na dui itavi era qarava, e laurai nira qarava vinaka, e donu nodra rai, ra qai dau mamarau. E veiyabaki keitou dau ciqoma e levu na ivola ni nodra vakavinavinakataka na lewenivanua na totoka ni nodra cakacaka na iVakadinadina i Jiova. Era dau kaya tu ga na iliuliu ni dui ni tabana ena veiqaravi qo na totoka ni nodra cakacaka.”

Era vakavinavinakataka na iVakadinadina i Jiova e Armenia ni rawa nira veivuke vei ira na lewenivanua ena tabana ni veiqaravi qo. E lagiti tale ga kina o Jiova ena nodra “ivakarau vinaka.”​—1 Pita 2:12.