Ena ika22 ni Seviteba 2022, e kaya na mataveilewai na Goranboy District Court e Azerbaijan, me vesu me ciwa na vula o Brother Seymur Mammadov e yabaki 22, ni sega ni via curu ena mataivalu. E vesu ni tau oti ga na lewa. Na vakatulewa qori e beci kina e rua na lewa a tauca na Mataveilewai ni Dodonu ni Lewenivanua e Urope (ECHR) vei Azerbaijan.

Tekivu mai na 2019, e tauca e rua na lewa na ECHR ena kisi ni veilewai na Mamedov and Others v. Azerbaijan, kei na Mekhtiyev and Abilov v. Azerbaijan. Qori e tokoni kina na nodra dodonu na tacida mera kua ni vakaitavi ena mataivalu. Na dodonu qori e volai tu ena Article 9 ni European Convention.

Ena kisi ruarua qori e vakadinadinataka na matanitu o Azerbaijan ina ECHR ni beca nodra dodonu na tacida. E kaya tale ga ni na saumi ira vakailavo ena veika tawadodonu e cakava vei ira. Ia e sega ni muria o Azerbaijan na lewa qori ni beca na nona dodonu o Brother Mammadov.

Ena ika4 ni Me 2022, e vakaroti kina ena imatai ni gauna o Seymur Mammadov me rairai ena keba ni mataivalu, ena yasayasa o Goranboy. E vakamacalataka mai na iVolatabu vei ira na vakailesilesi na vuna e sega ni curu kina ena mataivalu, qai kerea me soli vua e dua na cakacaka me kena isosomi. E sega ni vakadonui na nona kerekere. Ia e dei tu ga o Brother Seymur.

Gauna qo e vesu tiko o Brother Seymur ena siti o Ganja. Dina ni sotava na ituvaki dredre, e donu tu ga nona rai. E kaya ni sa vakamacalataka nona vakabauta vei ira e 30 na kaivesu. Eso vei ira era taleitaka na ka dina ena iVolatabu.

E kerea nona loya me rogoci tale nona kisi. Eda nuitaka ni na tauca vakadodonu na lewa na mataveilewai na Ganja Court of Appeals, me sereki ira tale ga na tacida mai valeniveivesu.

Eda vakadeitaka ni na tokoni Brother Seymur tiko ga o Jiova ena gauna dredre qo.—Aisea 43:2.