E vakadonuya na ECHR (na mataveilewai ni nodra dodonu na lewenivanua e Urope), mera qaqa na iVakadinadina i Jiova ena rua na kisi ni veilewai me baleta nodra dodonu vakalotu e Azerbaijan. Eda nuitaka ni vakatulewa e cakava qori na ECHR, ena vakadeitaka e dua na yavu dei ni nodra dodonu ni sokalou na tacida ena vanua taucoko qori.

Ena ika20 ni Feperueri 2020, a tauca na Mataveilewai na kisi ni Nasirov and Others v. Azerbaijan, e rube tu mai ena 2010. Na kena ikarua na kisi, Religious Community of Jehovah’s Witnesses v. Azerbaijan, e rube tu mai ena 2009. Na kisi me baleti Nasirov, e kaya na mataveilewai ni beca na matanitu o Azerbaijan na lawa ni ECHR ena Article 5 kei na 9 (Liberty of Person and Freedom of Religion). Ena 2010, e vesuki ira na iVakadinadina i Jiova na matanitu o Azerbaijan, beitaki ira, qai totogitaki ira vakailavo nira vunau tiko. E vakarota kina na Mataveilewai ina matanitu qori me saumi ratou yadudua na iVakadinadina i Jiova ratou vakalolomataki, me ratou ya $3,235.80 (EUR 3,000), na kena isoqoni kece e $22,650.60 (EUR 21,000). Na kisi ni Religious Community of Jehovah’s Witnesses, e kaya na Mataveilewai ni beca o Azerbaijan na lawa ni Article 10 (Freedom of Expression), ni vakatabui ira na tacida mera vakauta se veisoliyaka eso na noda ivola vakaivolatabu.

E kaya o Jason Wise, e dua vei ratou na loya e qarava tiko na kisi qori: “Vica vata na yabaki na kena vakadredretaki tu vei ira na iVakadinadina i Jiova e Azerbaijan na vakau ni ivola vakaivolatabu kei na nodra veisoliyaka. Keimami valataka e levu na kisi me rawa ni vakau mai na ivola, okati kina nodra vesu na mataveitacini nira vunau tiko. Ena guiguilecavi dredre dina vei ira na iVakadinadina i Jiova e Azerbaijan na rua na vakatulewa ni ECHR. Na kisi ni Religious Community of Jehovah’s Witnesses, e kaya na ECHR ni sega ni vakavuleqa vei ira na vo ni lotu e Azerbaijan na noda ivola vakaivolatabu, se me vakavuca. Na kisi nei Nasirov, e vakadeitaka na ECHR ni rawa nira veisoliyaka na tacida na ivola vakaivolatabu vei ira na lewenivanua. Eda marau dina ni tutaka na ECHR na galala ni lotu kei na ivakamacala e Azerbaijan.”

E kaya o Brother Famil Nasirov: “Ena veigauna sa oti, dua na ka na levu ni dredre keimami sotava eke. Sa dau matau vei keimami na vesu vei ira na ovisa, keimami vakatarogi tale ga ena loma ni 4-5 na aua. Ia sa oti kece qori, keimami sa rawa tale ni vunau ena veivuke ga i Jiova, kei na nodra veitokoni na mataveitacini.”

Ni bera mada ga na vakatulewa qori ni ECHR, era dau marautaka tu na mataveitacini e Azerbaijan na galala ni sokalou. Sa vakadonuya na matanitu me vakau mai na ivola vakaivolatabu vei ira na tacida, mera veisoliyaka tale ga. Tekivu mai na Janueri 2017, era sa sega ni totogitaki na tacida nira gole ena soqoni. Ena gauna qo, sa vakayacori tiko na soqoni ena tolu na Vale ni Soqoni e Baku, kei na nodra vale na mataveitacini. Tekivu mai na 2015, e vakadonuya na matanitu o Azerbaijan mera redetaka na tacida e dua na vanua mera vakananuma kina na mate i Karisito, mera tiko ena soqo ni veiwasewase kei na soqo siga dua.

Eda vakavinavinakataki Jiova ena vakasakiti ni vakatulewa qori, kei na nona tokoni ira tiko ga na mataveitacini e Azerbaijan.—Same 98:1.