E rau sa sereki o Brother Royal Karimov kei Brother Seymur Mammadov mai Azerbaijan. Rau a vesu tu ni rau a sega ni via curu ena mataivalu.

Me vaka ga sa vakarogoi oti, e sega ni vakadonuya na nona kerekere o Seymur na mataveilewai e Azerbaijani. Ena ika22 ni Seviteba 2022, e totogitaki me curu e valeniveivesu. Na nona totogitaki e beci kina e rua na lewa e tauca na European Court of Human Rights me baleti Azerbaijan. E kerea nona loya o Seymur me bokoci na kena itotogi. Ena ika12 ni Tiseba 2022, e kaya na mataveilewai na Ganja Court of Appeals me sa kua ni curu e valeniveivesu ia me sa rube na nona kisi. Dina ga ni sa sere o Seymur ia e kerea tiko ga ina mataveilewai na Supreme Court of Azerbaijan me bokoci na vo ni kena itotogi.

E tokoni Seymur tiko ga o Jiova, dina ga ni vakatabui me soli vua na iVolatabu se me ciqoma na ivola e vakau vua. E kaya: “Ni vo e dua na siga meu rairai kina ena mataveilewai ena iotioti ni gauna, au vola ena dua na tikinipepa na Josua 1:5, 6 e kaya: ‘Me vaka ga niu dau tokoni Mosese, au na tokoni iko tale ga. Au na sega ni biuti iko se vakanadakui iko.’” Qori e vakayaloqaqataki Seymur ena gauna e vesu kina. E kaya ni dau vakananuma na tikinivolatabu qori ena veisiga.

Era kaya na vakailesilesi me rairai yani o Royal ina keba ni mataivalu ena ika30 ni Maji 2022. E sega ni via curu ina mataivalu o Royal ena vuku ni nona vakabauta qai kerea me soli vua e dua na cakacaka me kena isosomi. Ia e sega ni vakadonui na nona kerekere. Ena ika25 ni Julai 2022, era vesuki koya na vakailesilesi ni matanitu qai vesu tu vakatawadodonu ina keba ni mataivalu me yacova na imatai ni Noveba 2022. E kerea o Royal mera vaqaqa na vakailesilesi na ka e cakava na mataivalu.

E kaya, “Ni tukuni vei au niu sa na sega ni sereki dua na ka noqu rarawa. Ia au saga meu vakasamataka ni qo na sala e vakatovolei kina noqu vakabauta.”

Ena gauna e vesu tu kina o Royal e vakadonui me sikovi koya yani o ganena. E solia vua e dua na nona iVolatabu. Qori e vaqaqacotaka nona vakabauta. E kaya, “Eso na gauna au dau yalolailai, ia e dau vakaukauataki au tale o Jiova. Au dau lomavakacegu niu wili iVolatabu qai dau masu vei Jiova.”

Meda masulaki ira tiko ga na vakailesilesi e Azerbaijan mera tarova na nodra vesuki ira na tacida era sega ni via curu ena mataivalu. Ia me vaka ga e caka ena levu tale na vanua, me vakarautaki e dua na cakacaka me isosomi ni curu ina mataivalu.—1 Timoci 2:1, 2.