Ena ika24 ni Seviteba, 2020 e tauca na European Court of Human Rights (ECHR) e rua na lewa era tokoni kina na iVakadinadina i Jiova e Azerbaijan. Na matai ni lewa e baleta na nona veilewaitaki o Valiyev kei ira eso tale (Valiyev and Others v. Azerbaijan), na kena ikarua e baleta na nodra veilewaitaki na iVakadinadina i Jiova e Azerbaijan (Religious Community of Jehovah’s Witnesses v. Azerbaijan). Na lewa qo ena taqomaka na nodra dodonu vakalawa na tacida mera sokalou ena galala ena vanua ya.

Ena rua na kisi ni veilewai qo, e tukuna na matanitu o Azerbaijan ni beca na nodra dodonu vakalawa na tacida e kea. Ena vuku ni ka e yaco, e vakatulewataka na matanitu me saumi ira vakailavo na tacida me rauta ni $22,146 na ilavo ni Merika. Na veika e tauca na ECHR e vakaraitaka ni vakadonuya na veika e sa vakatulewataka qo o Azerbaijan.

Na kisi ni veilewai i Valiyev kei ira ira eso tale, e kau cake ina ECHR ena 2011, e baleti ira tiko na tacida ena siti o Ganja. Sa vicavata na yabaki na nodra tarova tiko na ivakalesilesi na noda vakalawataki na iVakadinadina i Jiova e kea. O koya gona, era tarova vakalevu na ovisa na noda soqoni, era vesu na tacida qai totogitaki ena dua na ilavo levu. Ena levu ni nona vesu qai totogitaki e dua na tacida tagane, e sauma kina e rauta ni $11,375 na ilavo ni Merika. Eso na mataveitacini era vesu nira sega ni sauma rawa na levu ni ilavo era totogitaki kina.

Ena 2013, era kauta cake na tacida ina ECHR na ikarua ni kisi ni veilewai me baleti ira na tacida e Azerbaijan, qori nira vakatabuya na ivakalesilesi me vakau yani e levu na noda ivola.

E dina ga ni sebera tiko ga ni vakadonui me vakalawataki na noda cakacaka na iVakadinadina i Jiova e Ganja, ia sa vinaka cake sara na nodra sokalou na tacida e kea. Ena vica na yabaki tiko ga qo, era sa sega ni tarovi na nodra soqoni vakaiwasewase lalai na tacida ena nodra vale na mataveitacini. Kena ikuri, dina ga nira se dikeva tiko ga na ivakalesilesi na noda ivola kece era vakau yani, ia sa vakatarai e dua na iwiliwili levu.

Qo na ka e kaya o Brother Kiril Stepanov, e veiqaravi ena tabana ni iTukutuku ni iVakadinadina i Jiova e Azerbaijan: “Eda nuitaka ni veika e sa vakataulewataka qo na ECHR ena vakarawarawataka na kena vakalawataki na noda cakacaka e Ganja kei na so tale na siti e Azerbaijan. Ena rawarawa tale ga na kena vakau mai na noda ivola kece”

Eda vakavinavinakataka na veivuke i Jiova. Na vakataulewa qo ni mataveilewai e vakaraitaka ni ‘tawayaga na iyaragi kece e buli mera valuti kina na tamata ni Kalou.’—Aisea 54:17.