Ena ika26 ni Epereli 2021, e vakataulewataka na UN Human Rights Committee na kisi me baleti Aziz Aliyev and Others v. Azerbaijan. Qo sa ikatolu ni lewa era tokoni kina na iVakadinadina i Jiova e Azerbaijan, qai dokai na nodra dodonu mera sokalou.

Na kisi ni veilewai qo e baleta tiko na nodra curuma vakatawadodonu na ovisa eso na vale mai Aliabad ena yasayasa o Zagatala. Ena ika21 ni Seviteba, 2013, era curuma na ovisa na nona vale o Brother Aziz Aliyev nira soqoni tiko kina na tacida. Era vaqaqara ena nona vale, vakarerei ira na tacida, taura nodra ivola vakaivolatabu, eso na nodra veika vakaivola, kei na nodra ilavo. Era mani kau kece na tacida ina siteseni ni ovisa. Nira gole tiko e tauvi Sister Havva Aliyeva na manumanusoni qai sega tale ga ni vakilai koya. Era mani kauti koya na ovisa i valenibula. Na gauna e vakilai koya mai kina, e kau ina siteseni ni ovisa me lai vakatarogi.

Toso na gauna, e vakataulewataka na mataveilewai na Zagatala District Court, mera totogitaki e levu na tacida mera sauma e $1,716 na ilavo ni Merika. E duavata na Sheki Court of Appeals ena vakataulewa e sega ni vakalawa qori. Ni sa sega ni rogoci nodra kisi na tacida e Azerbaijan, era mani kerea me rogoca na UN Human Rights Committee.

E kaya na Komiti ni beca na matanitu o Azerbaijan na dodonu ni nodra sokalou na tacida, e cala tale ga nona vesuki ira na tacida qai totogitaki ira. E kaya tale ga ni o ira na vakailesilesi kei ira na ovisa, era vakarerei ira na tacida, vosataki ira qai vosa vakacacataka na nodra lotu. Ia era sega ni tukuna na sala e vakaleqai ira kina eso tale na nodra soqoni se na noda ivola vakaivolatabu. E mani vakarota ina matanitu o Azerbaijan me sauma lesu na ka era totogitaki ira kina na tacida, me kua tale ga ni qai vakacacani se totogitaki ira tale. Koya gona, mera veisautaka se bulia eso na lawa e Azerbaijan mera taqomaki kina na tacida.

Ena vica na yabaki sa oti, eda marau ni sa soli vei ira na tacida e Azerbaijan na galala mera soqoni vata. Eda vakavinavinakataka na noda Kalou o Jiova, ni sa qai tauyavutaka tiko ga na ka dina ena vanua ni veilewai.—Filipai 1:7.