Ena Noveba kei na Tiseba 2021, e tauca na lewa na komiti na United Nations Human Rights Committee (CCPR), ena kena tokoni na nodra dodonu na tacida mera wasea na nodra vakabauta. A tau na lewa qori ena vukudrau e rua na tacida yalewa rau vesu vei ira na vakailesilesi e Azerbaijan, ni rau wasea tiko vei ira eso tale na itukutuku ena iVolatabu.

Ena ika5 ni Noveba 2021, e tokona na CCPR na nodrau dodonu ni vunau o Sister Matanat Gurbanova kei Sister Saadat Muradhasilova. Rau vesu ni dua e ripotetaki rau vei ira na vakailesilesi ena Noveba 2014. Rau qai totogitaki me rau sauma e rauta ni $880 na ilavo ni Merika. E kaya na CCPR ni cala na ka e caka vei rau, qai vakarota na matanitu o Azerbaijan me cakava na ka kece e rawata me kua ni vesuki ira tiko va qori na tacida nira wasea na nodra vakabauta.

Rau veitacini o Matanat kei Saadat, rau kaya: “Era via vakarerei keirau na ovisa kei na turaganilewa, ia na gauna qori sa qai qaqaco ga na neirau vakabauta. E vakaraitaka tale o Jiova ni sega ni dua na ka e dredre vua, e kila tale ga na ka me cakava me taqomaki ira kina na nona dauveiqaravi.”

E tautauvata tale ga qori na lewa a tau ena ika21 ni Tiseba 2021, e kaya na CCPR ni ratou sega ni muria na lawa na ovisa ni Azerbaijan ena nodratou vesuki Sister Jeyran Azizova kei Sister Gulnaz Israfilova, ni rau “vunau tiko ena dua tale na vale.” E vakadeitaka na CCPR ni sega ni cala na nodrau wasea tiko nodrau vakabauta.

Ena Noveba 2016, rau sikovi ira nodrau itokani o Jeyran and Gulnaz ena Yasayasa o Goranboy e Azerbaijan, rau wasea tale ga na itukutuku ena iVolatabu vei ira eso tale. E mani ripotetaki rau vei ira na ovisa e dua na vakailesilesi, rau qai vesu. Rau veilewaitaki qai beitaki rau na turaganilewa ni rau yamata vuni, e totogitaki rau tale ga me rau sauma e rauta ni $1,176 na ilavo ni Merika. Rau kerea me rogoci tale nodrau kisi, ia e sega ni veisau na lewa e tau. Rau sa qai lai kerekere ina CCPR.

Na tau vakadodonu ni lewa e taqomaka na noda dodonu meda wasea na itukutuku vinaka. Qori na cakacaka e bibi duadua vei keda. Eda marautaka nodratou ivakaraitaki vinaka na tacida yalewa qo, ni ratou yaloqaqa ni vunautaka na itukutuku vinaka.—Maciu 10:18.