Ena Okotova kei na Noveba ni 2020, e tauca e vica na lewa na Mataveilewai ni Dodonu ni Lewenivanua e Urope (ECHR) me tokona kina nodra sokalou na iVakadinadina i Jiova e Azerbaijan. Qo na yaca ni kisi ni veilewai: Gridneva v. Azerbaijan, Sheveli kei Shengelaya v. Azerbaijan, Jafarov v. Azerbaijan, kei Tagiyev v. Azerbaijan. Na lewa e tauca qo na ECHR e vaqaqacotaka na nodra dodonu vakalawa na tacida mera vunau, soqoni qai vakau yani na noda ivola e Azerbaijan.

E kau cake na kisi ni veilewai qo ena 2011 kei na 2012. E okati ena kisi na Gridneva v. Azerbaijan kei Sheveli kei Shengelaya v. Azerbaijan na nodra curuma yani vakaukaua na noda soqoni na ovisa kei na nodra tarova na cakacaka vakavunau. Na kisi ni veilewai na Jafarov v. Azerbaijan kei na Tagiyev v. Azerbaijan e baleta na nona tarova na matanitu na kena vakau yani na noda ivola e Azerbaijan.

Ena tolu na kisi qori (Gridneva v. Azerbaijan, Jafarov v. Azerbaijan, kei Tagiyev v. Azerbaijan), e tukuna na matanitu o Azerbaijan nira sega ni doka na noda dodonu na tacida, era vakadonuya tale ga mera saumi na tacida ena $12,880 na ilavo ni Merika.

Na kisi ni veilewai na Sheveli kei Shengelaya v. Azerbaijan, e baleta na nodrau vesu vakatawadodonu e dua na veiwatini rau veiqaravi vakaivakatawa ni tabacakacaka, rau qai vakau tani mai Azerbaijan. E kaya na ECHR me saumi rau na veiwatini na matanitu ena $3,680 na ilavo ni Merika.

E kaya na ECHR ena gauna e tau kina na lewa: “Na nodrau totogitaki na veiwatini ena vuku ni nodrau vakabauta e sega ni salavata kei na European Convention on Human Rights. Ke tukuni ni donu na nodrau totogitaki na veiwatini e dusia ni o Azerbaijan e sega ni vakadonui ira na lotu era sega ni kilai vakalawa. Qori e vaka me tukuna tiko na matanitu ni lewa na nodra vakabauta na lewenivanua.”

Ena vica na yabaki ga qo, sa veitokoni tiko na matanitu o Azerbaijan vei ira na tacida. Eda marau ni tokona na nodra dodonu ni sokalou e Azerbaijan na lewa e mai tauca qo na ECHR. Ia eda vakavinavinaka sara vakalevu vua na Kalou o Jiova ni noda “ivakaruru kei na kaukaua.”—Same 46:1.