Ena ika15 ni Tiseba 2020, e tauca na UN Human Rights Committee (Mataveilewai ni Dodonu ni Lewenivanua e Urope) e rua na lewa e tokoni ira kina na iVakadinadina i Jiova e Azerbaijan. Qo na kisi ni veilewai: Rahima Huseynova v. Azerbaijan; kei na Saladdin Mammadov, Rashad Niftaliyev and Sadagat Abbasova v. Azerbaijan. E kaya na komiti ena kisi ruarua qori ni beca na matanitu na nodra dodonu na iVakadinadina i Jiova, qai kerea me veisautaka nona lawa me kua kina ni yaco e dua tale na ka va qori.

Na kisi na Rahima Huseynova v. Azerbaijan, e baleta nodra vesuki sister Rahima Huseynov na ovisa ni vunau tiko ena siti o Baku ena Tiseba 2014. E totogitaki koya na mataveilewai me sauma e rauta ni $882 na ilavo ni Merika ni sega ni vakalawataki tu ena gauna qori o ira na iVakadinadina i Jiova e Baku. a E rogoci tale nona kisi, ia e sega ni veisau na lewa. E mani kauta o sister Huseynova nona kisi me lai rogoci ena dua na mataveilewai ni veimatanitu.

E kaya na UN Human Rights Committee ni beca na matanitu na veidinadinati ena Article 18(1) ni International Covenant on Civil and Political Rights (ICCPR). E kaya na komiti ina matanitu o Azerbaijan me saumi vakailavo o sister Huseynova. E tukuna tale ga me “cakava na ka kece e rawata me kua ni beci tale kina va qo na nona dodonu e dua na lewenivanua.” Kena ibalebale, ena vinakati vei Azerbaijan me veisautaka nona lawa se na ka e dau cakava me rawa ni taqomaki, qai dokai kina na nona dodonu e dua me salavata kei na Article 18 ni veidinadinati ni ICCPR.”

Na kisi na Saladdin Mammadov, Rashad Niftaliyev and Sadagat Abbasova v. Azerbaijan e baleta na nodra soqoni vata na mataveitacini mera vulica na iVolatabu ena vale nei brother Saladdin Mammadov, ena siti e Ganja . Ena Okotova 2014, era tarova na soqoni qori na ovisa ra qai yanaraka na vale. Era taura kina eso na iVolatabu kei na so tale na ka. Ratou qai vesu tu ena siteseni ni ovisa me sivia e ono na aua o brother Mammadov, brother Rashad Niftaliyev, kei sister Sadagat Abbasova. Oti e rua na siga ratou qai rairai ena mataveilewai na Nizami District Court. E kaya na mataveilewai ni cala na nodra soqoni vata na mataveitacini ni sega ni vakalawataki e Ganja na lotu era lewena. Ratou totogitaki na mataveitacini me ratou sauma yadua na ilavo e rauta na $1,176 na ilavo ni Merika. Ratou kerea na mataveitacini me rogoci tale na nodratou kisi, ia e sega ni veisau na lewa e tau me baleti ratou. Ratou mani kauta cake na nodratou kisi ina UN Human Rights Committee.

E raica na komiti ni beca o Azerbaijan e vica na lawa ena veidinadinati ni ICCPR qai dodonu me saumi ratou vakailavo na tacida. E vola tale ga “ni sega ni vakamatatataka na mataveilewai ni yasana na vuna me vakalawataki kina na nodra lotu na tacida ni bera nira soqoni vata ena dua na vale mera sokalou.” Ratou vola talega ni tu vei ira na dodonu mera sokalou vata ke sega mada ga ni vakalawataki na nodra lotu.

Me vaka ga na kisi na Rahima Huseynova, e kerea tale ga na komiti ina matanitu “me veisautaka na nona lawa, se ka e dau cakava” me salavata kei na veidinadinati ena ICCPR.

Eda marautaka ni sa vinaka cake sara na kedra ituvaki na tacida e Azerbaijan, ra qai doka tale ga na vakailesilesi na nodra dodonu ni sokalou. Eda nuitaka na rua na lewa e tau qo ena tokona vakalawa na kena kacivaki tiko ga na itukutuku vinaka e Azerbaijan.—Filipai 1:7.