Ena ika6 ni Julai 2018, e vakatulewataka na Mataveilewai ni Yasana mai Barda e Azerbaijan me totogi yabaki dua na tacida cauravou o Emil Mehdiyev. E yabaki 18 o Emil qai vakatulewataka na mataveilewai ni cala na nona sega ni vakaitavi ena mataivalu, ia a sega ni bala e valeniveivesu. E totogitaki ga me kua ni biuta nona itikotiko vakavo ke ra vakadonuya na vakailesilesi, sega tale ga ni vakatarai me biuti Azerbaijan.

A rairai o Mehdiyev ina Tabana ni Matanitu e Qarava Nodra Vakarautaki na Mataivalu ena Yasayasa o Barda ena Tiseba 2017. E sega ni curu ina mataivalu ni sega ni vinaka kina nona lewaeloma ke vakaitavi ena veika vakaivalu. E mani samanitaki, qai vakamacalataka na vu ni nona tawaveitovaki, e kerea tale ga ke rawa ni cakava e dua tale na cakacaka me isosomi ni nona curu ena mataivalu. E tukuni vua ni sega tale ni dua na cakacaka va qori e tiko, sa na lai rogoci sara nona kisi ena tabana ni dauveibeitaki ena valenivolavola ni yasana o Barda.

Sa oti e dua na gauna balavu na kena rogoci tiko na nona kisi, rube tale ga vakavica mani vakatulewataka na Mataveilewai ni Yasana e Barda ni cala, e totogitaki sara. E sega ni vesu e valeniveivesu, ia sa na kilai ga ni dua na dau basulawa ni sega e Azerbaijan na cakacaka mera cakava o ira na sega ni vakaitavi ena mataivalu. Qori e dua na ka e dau yalataka wale tu ga na matanitu ni na vakarautaka.

Eda marau ni yalodina tiko ga ena nona tawaveitovaki o Mehdiyev, ia sa bau dredre dina na kena ituvaki.—1 Pita 2:19.