Ena ika31 ni Okotova 2018, rau duavata na Mataveilewai Levu e Ganya e Azerbaijan, kei na mataveilewai e ra me totogitaki o Brother Vahid Abilov e yabaki 19, ni sega ni via vakaitavi ena ivalu. E sega ni bala e valeniveivesu, ia e vakatabui vua eso na ka me dua na yabaki, ke beca qori ena bala e valeniveivesu. Kena ivakaraitaki, me dau ripote e veimacawa vua na ovisa e lesi me qarava nona kisi, e sega tale ga ni rawa ni biubiu mai Azerbaijan. Ena vakaraitaka o Vahid nona kudru ina Mataveilewai Cecere e Azerbaijan, na mataveilewai duadua ga sa vo me valataka kina nona kisi.

E se tekivu sara na kisi ni nona tawaveitovaki ena Me 2017. Ni se qai yabaki 18 o Brother Abilov, a tukuni vua me raici ratou na tabana e qarava nodra curu ena mataivalu na lewenivanua (Aghdam District Department of the State Service for Mobilization and Conscription). E mani vola e dua na ivola me vakamacalataka na vuna ena sega ni vakaitavi kina ena ivalu. E vola: “Noqu lewaeloma e vakavulici ena iVolatabu e uqeti au meu kua ni vakaitavi ena ivalu. Sega ni kena ibalebale qori niu bese na via veivuke ena itikotiko. Au kerea wale ga ke rawa niu cakava e dua tale na cakacaka, ia meu kua ga ni curu ena mataivalu.” Era sega ni duavata na vakailesilesi ena nona kerekere. Ena ika9 ni Julai 2018, era beitaki koya ni sega ni via curu ena mataivalu.

Ena gauna ni veilewai ena Mataveilewai Levu e Ganja, e vakamacalataka o Brother Abilov na inaki ni nona sega ni via vakaitavi ena ivalu. E wilika na Aisea 2:4 e valeniveilewai, qai vakamacalataka ni veika e vulica ena iVolatabu e uqeti koya “me kua ni vulica na vala.” Ia e sega ni veisautaka qori na vakatulewa e tauca na mataveilewai. Ena laurai ke duavata na Mataveilewai Cecere kei na nona kerekere.

Ena gauna e lewe kina ni Matabose e Urope o Azerbaijan ena 2001, e yalataka ni na muria na lawa ni kena vakarautaki e dua tale na tabana ni veiqaravi vei ira na sega ni vakaitavi ena ivalu. Me yacova mai qo, se sega tiko ga ni cakava qori na matanitu. Qori na vuna era sotava kina vakawasoma na tacida na kisi e vauca nodra tawaveitovaki. Ena itekitekivu ni yabaki qo, e beitaki na tacida o Emil Mehdiyev vei ira na mataveilewai ena dua na yasa i Azerbaijan, ni sega ni via vakaitavi ena ivalu. Me vakataki Vahid e vakatabui tale ga vua eso na ka me dua na yabaki. Sa vakaraitaka tale ga nona kudru ina Mataveilewai Cecere. Ena gauna qo e vo tale tiko e va na kisi me raica na Mataveilewai e Valataka na Dodonu ni Lewenivanua e Urope, me baleti ira na tacida e Azerbaijan ena nodra sega ni via vakaitavi ena ivalu. Se mani dredre vakacava na ituvaki era nuitaki Jiova tiko ga na tacida, ni na vukei ira ena nodra tawaveitovaki.—Joni 15:19.