Ena ika16 ni Epereli, 2018, e tokona na Mataveilewai Cecere kei Azerbaijan na vakatulewa ni mataveilewai e ra me baleta na kena soli na ilavo vei Irina Zakharchenko kei Valida Jabrayilova ena vuku ni nodrau a vesu vakatawadodonu me 11 na vula. Ena Feperueri 2017, e talaca nodrau kisi na Mataveilewai Cecere ena veibeitaki ni a sega ni vakadonui vakamatanitu nodrau veisoliyaka na ivola ni lotu. E mani vakarota na Mataveilewai Cecere me qarava na kisi ni kena saumi na ilavo ina mataveilewai ni veileti (civil courts).

Ni rau sa galala ena veibeitaki kece o Zakharchenko kei Jabrayilova, erau iVakadinadina i Jiova tale ga, rau rairai sara ina mataveilewai ni veileti me lai soli kina na ilavo ena vuku ni veika tawadodonu e caka vei rau. Ena Okosita 2017, e vakadonuya na mataveilewai ni yasana me soli vei rau na ilavo, ia e sega ni duavata kei na vakatulewa qori na Tabacakacaka ni iLavo (Ministry of Finance). Ena Noveba 2017, e duavata kei na vakatulewa ni mataveilewai ni yasana na mataveilewai e ra. Ia e sega tiko ga ni duavata kei na vakatulewa qori na Tabacakacaka, mani kauta cake nona kerekere ina Mataveilewai Cecere ena Feperueri 2018. E sega ni vakadonuya na kerekere qori na Mataveilewai Cecere mani tokona tiko ga na vakatulewa a tau, e soli kina na veivakadonui me soli na ilavo vei rau ruarua na yalewa.

E vakadinata tale ga na Mataveilewai Cecere na veika tawadodonu rau sotava o Zakharchenko kei Jabrayilova vei ira na ivakalesilesi, nira vakayagataka vakatani nodra lewa, era beca tale ga nodrau dodonu na marama e rua qo.