Ena ika17 ni Janueri 2023, e vakatabui kina na Vale ni Soqoni vou ena yanuyanu o Great Abaco e Bahamas. E solia na kena ivunau o Brother Mark Sanderson. A vakarusai na Vale ni Soqoni ena cagilaba kaukaua o Dorian ena Seviteba 2019. E mai tarovi tu na tarataravaki ena vuku ni matedewa na COVID-19 ni vo ga e tolu na macawa me vakaoti kina na cakacaka ena Maji 2020. E tekivu tale na tarataravaki ena 2021 me vakaoti kina na Vale ni Soqoni.

E kaya o Brother Sanderson ena ivunau ni vakananumi, “Na gauna e ravuta kina na yanuyanu na cagilaba, levu na ka e vakarusa, ia e dei tu ga na nomuni vakabauta kei na nomuni veiwekani kei na Kalou.’’

Ni vakatauvatani kei na vale kece era tu ena yanuyanu, na Vale ni Soqoni duadua ga e tara me tutaka na cagilaba. Era vakayagataka e 49 na dautukutuku ena rua na ivavakoso. Qori na ivavakoso vakavalagi kei na vosa vakaCreole ni Haiti. E rauta ni 175 era tiko ena gauna e vakananumi kina na Vale ni Soqoni qai 167 era sema ena nodra iyaya vakalivaliva. Era sureti mera mai sarasara ena Vale ni Soqoni na tacida kei na so tale na lewenivanua.

E veivuke tiko o Brother Jake Majure ena gauna e veitauvi mai kina na matedewa. E kaya o koya, “Dua na ka na neimami rarawa. E totolo na neimami vakavinakataka na vale era vakacacani. Sa voleka tale ga ni oti na tara ni Vale ni Soqoni me vakayagataki ena gauna ni vakananumi. Ia e qai tukuni me cegu na cakacaka.” E mai veivuke tale o Brother Jake Majure ena 2021, me mai vakaoti na tara ni Vale ni Soqoni kei na kena vakavinakataki eso tale na vale.

E kaya o Brother Sanderson: “E laurai na kena taravaki na Vale ni Soqoni qo na noda dau cakacaka vata qai veilomani na dauveiqaravi i Jiova. Nida yacova mai qo na Janueri 2023, dua na ka noda marau nida raica na Vale ni Soqoni vou.”

Eda nuidei ni Vale ni Soqoni vou qo ena uqeti ira e levu mera vakacaucautaki Jiova.—Esera 3:10.