Era kaya na turaganilewa kece ena Mataveilewai ni Dodonu ni Lewenivanua e Urope (European Court of Human Rights), ni cala nona lavaka na matanitu o Belgium na ivakacavacava ena ciwa na ivavakoso ni iVakadinadina i Jiova ena koroturaga o Brussels. Ena ika5 ni Epereli 2022, e tabaki ena niusipepa na lewa e tau ena kisi na Christian Assembly of Jehovah’s Witnesses and Others v. Belgium. Na veika e vakataulewataki kina ena taqomaka na dodonu ni noda sokalou e Belgium kei na so tale na veivanua e Urope.

Me yacova mai na 2018, e sega ni lavaki vei ira na lotu e Brussels mera sauma na ivakacavacava. Ena yabaki tale ga qori, e veisautaki na lawa qai tukuni me ratou kua ni sauma na ivakacavacava e ono na lotu e kilai ena vanua ya. Ena rawa nira sauma kina na tacida e $49,025 na ilavo ni Merika me nodra ivakacavacava.

E kaya na ECHR nira vakaduiduitaki na iVakadinadina i Jiova, e beci tale ga kina na veidinadinati ni European Convention on Human Rights.

Gauna e tau kina na lewa e kaya na ECHR, ni lasu na matanitu o Belgium ni tukuna mera kerea na tacida me vakaivolataka na matanitu na noda isoqosoqo. E vakatau tale ga ena Minisita ni Lawa na veivakadonui.

E kaya na ECHR ni na vakalawataki na lewa e tau. E sega tale ga ni namaki mera kerea qori na isoqosoqo lotu ke ra kila ni na sega ni tau vakadodonu na lewa, mera vakuai tale ga ena kena saumi na ivakacavacava ena vanua ni nodra soqoni. E kaya tale ga me tau vakadodonu na lewa e Belgium, qai kua ni vakaduiduitaki e dua na lotu me vakai ira na iVakadinadina i Jiova.

E kaya na ECHR nira sega ni lewa na vakailesilesi na nona vakabauta e dua, se na nona dodonu ni sokalou. Qori ena uqeti ira tale ga na veimatanitu e Urope mera kua ni lavaka na ivakacavacava e vakaduiduitaki keda.

Eda vakavinavinakataki Jiova na noda qaqa ena veilewai qo, e lagiti kina na yacana.—Vakatakila 15:4.