Era dau vakananuma e veiyabaki na iVakadinadina i Jiova na iVakananumi ni Mate i Jisu. E Belgium e rauta ni 49,040 era vakananuma na soqo bibi qo ena 2021. Qori e dua na iwiliwili levu duadua me tekivu mai na 1995. E vakaruataki kina na iwiliwili ni dautukutuku ena vanua qo.

E vakatubuqoroqoro na iwiliwili qo, ni levu e Belgium era sa sega ni dau lotu. Kena ivakaraitaki, ena 1970 e sivia ni 90 na pasede era kaya nira lotu vaKarisito, qai sivia ni 6 na pasede era kaya nira sega ni dau lotu. Ia wale tiko ga qo, e laurai ni sa lutu sobu ina 60 na pasede na lewenivanua era kaya nira lotu vaKarisito e Belgium. O ira era kaya nira sega ni dau lotu sa toso cake ina sivia na 40 na pasede.

Ena vica na yabaki sa oti, era tabaka na daunitukutuku e Belgium eso na itukutuku lasu me baIeti keda na iVakadinadina i Jiova. Dina ni yaco qori, ia e levu vei ira na lewenivanua e kea era via kila na veika dina me baleti keda. Levu na tataleitaki era vakadinadinataka na noda veilomani vakamataveitacini. Era vakila tale ga na yaga ni nodra muria na ivakavuvuli vakaivolatabu.—Joni 13:35.

Ena Feperueri 2021, e kaya na valenivolavola ni tabana ni iVakadinadina i Jiova e Belgium, nira le 11,804 era vulica tiko na iVolatabu. Qori e dua na iwiliwili levu, e tubu mai na sivia na 1,000 ni vakatauvatani kei na yabaki vakacakacaka ni 2020. Ena lima na yabaki sa oti, era papitaiso e veiyabaki e rauta ni 450 mera iVakadinadina i Jiova.

Na tubu vakasakiti qo e Belgium, e dua ga na ivakaraitaki era raica kina na iVakadinadina i Jiova e veiyasa i vuravura na vakayacori ni parofisai vakaiVolatabu: “O koya e lailai sara ena yaco me le duanaudolu.”—Aisea 60:22.