Ena ika29 ni Me 2022, e sevutaka o Brother Sylvain Bois, e lewe ni Komiti ni Tabana e Benin, na ivola The Bible—The Good News According to Matthew ena vosa vakaFon. E katoni na kena porokaramu, qai sevutaki ena iyaya vakalivaliva. Era sarava ena stream e rauta ni 7,000 na dautukutuku kei ira na tataleitaki. Ena qai tiko na kena ilavelave tabaki ena Tiseba 2023.

E tiko eso na iVolatabu sa vakadewataki ena vosa vakaFon, ia e kau laivi kina na yaca ni Kalou qai sega ni vakadewataki donu e levu na kena matavosa e vakadewataki mai kina ena iVolatabu taumada. E sau levu, eso tale ga na sitoa era sega ni via volitaka vei ira na tacida.

Ia na vakadewa vou qo e vakavotuya vinaka mai na vakasama a volai taumada kina na iVolatabu. Kena vakaraitaki, e kaya na Maciu 10:28: “Dou kua ni rerevaki ira era vakamatea na yago ia era sega ni vakarusa rawa na bula.” Na ivakamacala e ra ni tikinivolatabu qori e vakamacalataka na vosa taumada ni “bula,” e kena ibalebale “na bula e se bera mai.” Eso na ka va qori ena yaga vei ira na dautukutuku nira vakavulici ira na tataleitaki ena cakacaka vakavunau.

E kaya o Brother Palle Bjerre, e lewe ni Komiti ni Tabana e Benin: “E levu na idusidusi ni ivola i Maciu ena noda ivola vakaivolatabu. Na kena vakadewataki donu na Kosipeli i Maciu ena yaga vakalevu ena cakacaka vakavunau. Eda vakavinavinakataki Jiova, kei ratou na timi ni vakadewa ena nodratou cakacaka vagumatua me rawa ni sevutaki na ivola qo.”

Eda nuidei ni na vukei ira tacida era vosa vakaFon na vakadewa qo mera volekati Jiova tiko ga, ra qai vukei ira eso tale mera veivolekati kei koya.—Maciu 5:3.