Ena ika27 ni June 2021, e sevutaki na New World Translation of the Holy Scriptures ena vosa vaka-Aymara. E sevutaki ena iyaya vakalivaliva, qai katoni tale ga na kena porokaramu. Era sarava na porokaramu qo na ivavakoso, kei na iwasewase lailai kece e Bolivia. E sevutaka na iVolatabu qori o Brother Nelvo Cavalieri, e lewe ni Komiti ni Tabana e Bolivia.

• Era vosataka na vosa qo e sivia ni 1.6 na milioni na lewenivanua, era tiko volekata na Lake Titicaca ena veiulunivanua na Andes

• E vosataki e Bolivia e 36 na vosanivanua. Na vosa vaka-Aymara e ikarua ni vosa e vosataki vakalevu duadua e kea.

• Era veiqaravi tiko e voleka ni 2,000 na dautukutuku ena 60 vakacaca na ivavakoso vosa vaka-Aymara e Argentina, Bolivia, Brazil, Chile, kei Peru

• Ratou vakadewataka e 6 na tacida na iVolatabu qo me 4 na yabaki

E kaya dua vei ratou na daunivakadewa: “Qo e iloloma talei i Jiova vei ira na lewenivanua era vosa vaka-Aymara. Era sa rawa ni kila vinaka na iVolatabu nira wilika ga ena nodra vosa. E vaka ga e vosa sara tiko ga vei ira o Jiova.”

E kaya o Brother Mauricio Handal, e lewe ni Komiti ni Tabana e Bolivia: “E sevutaki ena 2017 na iVolatabu vaKirisi vaKarisito ena vosa vaka-Aymara. E levu era vakavinavinakataka na iVolatabu qori. Ia qo sa tiko na iVolatabu taucoko qai vakadewataki ena vosa e matata, e kilai rawarawa tale ga. Keitou vakadeitaka ni na vukei ira na dauwiliwili mera kila vinaka na iVolatabu. Koya e bibi sara mera volekati Jiova o koya e vakavuna na volai ni iVolatabu.”

Eda kila nira na duavata kei na daunisame na mataveitacini era vosa vaka-Aymara ni kaya: “Au diva vakalevu na nomuni veivakabulai. Ni nomuni vosa e noqu inuinui.”—Same 119:81.