Ena ika24 ni Okotova 2021, e sevutaka na New World Translation of the Holy Scriptures ena vosa vaQuechua (Bolivia) o Brother Douglas Little, e lewe ni Komiti ni Tabana e Bolivia. E katoni na kena porokaramu qai sevutaki ena iyaya vakalivaliva. Era sarava ena internet e sivia na le 4,000 e Bolivia. E tuvanaki tiko me veisoliyaki na kena ilavelave tabaki ena Epereli 2022.

E levu tu na mataqali vosa vaQuechua (Bolivia). Eso na vosa e duidui tu na kedra ibalebale, e vakatau ena vanua e vosataki kina. Ia e wali na ituvaki qori, ni sa okati ena New World Translation na ivakamacala me vakamatatataki kina eso na ibalebale ni vosa ena rairai duidui na kena ibalebale.

Tekivu ena 1880 sa tiko na iVolatabu vaQuechua (Bolivia). Ia e e levu na vakadewa ni iVolatabu qori era sosomitaka na yaca ni Kalou o Jiova ena icavuti “Tamada na Kalou.” Eso tale era biuta na yaca ni Kalou ena ivakamacala e ra. Ia e kaya e dua vei ratou na daunivakadewa: “Au marautaka vakalevu ni sa dua na iVolatabu e tiko kina na yaca ni Kalou.”

Ratou sotava tale ga e levu na daunivakadewa na ituvaki dredre ena gauna e vakadewataki tiko kina na iVolatabu qo. Kena ivakaraitaki, na nodra qaravi na wekadratou era tauvimate. E vakadredretaka tale ga na nodratou cakacaka na veitauvi ni COVID-19. E kaya e dua vei ratou: “Ena veivuke ga i Jiova e rawa kina ni vakaoti na kena vakadewataki na iVolatabu qo, qai sevutaki totolo tale ga.”

Eda nuitaka ni na vukei ira e levu era vosataka na vosa qo na New World Translation of the Holy Scriptures ena vosa vaQuechua (Bolivia), me rawa nira ‘bula mera mai kila vinaka tale ga na ka dina.’—1 Timoci 2:4.