Ena ika31 ni Me ina ika11 ni June 2023, e vakayacori ena siti o Santa Cruz de la Sierra e Bolivia, na soqo e vakatokai na International Book Fair of Santa Cruz. Era tiko kina e sivia na le 120,000 na vulagi. Era vakarautaka tale ga na tacida e dua na vanua me vakaraitaki kina na noda ivola, vakabibi Na Vale ni Vakatawa Nb. 1 2023, “Nomu Vakasama—Yaga Vakacava na iVolatabu?”

Era vakaitavi kina e voleka na 200 na tacida qai sotavi ira e sivia na 20,000 na vulagi. E vakaraitaki na noda vidio mai na website, qai ra vulica na vulagi na sala mera vakekeli kina ena jw.org. E veisoliyaki e voleka ni 5,500 na noda ivola kei na voleka ni 600 na vidio. Kena ikuri, era kerea ena jw.org na le 45 mera vulica na iVolatabu.

E raica e dua na marama na ulutaga me baleta mate ni vakasama, e gole vua na tacida qai kaya ni dau vakila tiko qori o tinana. E kaya tale ga ni dau nuiqawaqawa qai lomabibi. E vukei koya na tacida yalewa me download ena nona talevoni na Vale ni Vakatawa kei na brochure Marau me Tawamudu! E vakalewena tale ga ena jw.org na fomu me tekivu vulica na iVolatabu.

E soli tale ga vua e dua na vuniwai ni vakasama na Vale ni Vakatawa qori, e kaya: “Au na solia na mekesini qo vei ira au dau qarava. Ena yaga vakalevu vei ira na ivakasala kei na tikinivolatabu e tu kina.” E dua tale na marama e se qai takali ga o tinana, e vakayaloqaqataki koya na ulutaga “Ni Takali e Dua na iTubutubu” ena iwasewase “Vakacegu kei na Marau” ena jw.org.

E vakilai vakalevu nikua na nuiqawaqawa kei na lomabibi, era marau gona na tacida e Bolivia mera vukei ira e levu mera raica na ivakasala yaga e vakarautaka o Jiova ena nona Vosa na iVolatabu.—Same 34:18.