Ena ika23 ni June 1947, e rejisitataki na isoqosoqo ni iVakadinadina i Jiova e Brazil, na Sociedade Torre de Vigia de Bíblias e Tratados (Watch Tower Bible and Tract Society). Qo sa ika75 ni yabaki ni kena vakalawataki na noda isoqosoqo ena vanua qori. E vica vata na yabaki nodra vosota tu mai na tacida na veivakacacani me rawa ni vakalawataki.

Ena ika13 ni Okotova 1945, era veisoliyaka na mataveitacini e Brazil vei ira na lewenivanua e dua na ivola ni kerekere me vakalawataki na noda isoqosoqo. Rauta ni 400 na tacida era vakaitavi kina, ra qai sainitaka na ivola qori e 44,411 na lewenivanua. Era mani vakauta qori na tacida vua na peresitedi, ia e sega ni tukuna mai e dua na kena macala.

Ena 1946, e biu e dua na yavu ni vakavulewa vou e Brazil. Na yavu ni vakavulewa qori e rejisitataki rawa kina na Watch Tower Bible and Tract Society. Ena yabaki tale ga qori, era vunau kina e veivula e rauta ni 442 na dautukutuku.

Era sega ni marautaka qori na iliuliu ni lotu. Ena ika3 ni Noveba 1949, ena nodra veiuqeti na iliuliu ni lotu, e vakalawataka kina na peresitedi me vakatabui qai sogo na Watch Tower Society. Era mani kauta qori na tacida ina mataveilewai. E rogoci tiko na kisi me yacova nona vakadonuya na peresitedi na nodra kerekere na tacida ena ika8 ni Epereli 1957.

Dina nira vakila tiko na tacida na veika dredre ena ka vakalawa, ia e vakalougatataka tiko ga o Jiova na nodra cakacaka vakavunau. Ena 1941, a papitaiso o Brother Djalma Mendes Souto, a lewe tale tu ga ni Watch Tower Society ena gauna e tauyavu kina e Brazil. E kaya: “E sega vakadua ni luluqa na neimami vakabauta, gugumatua, kei na neimami nuitaki Jiova. E tubu tiko ga kina na iwiliwili ni dautukutuku. Ena 1947, dua na ka neimami marau ni se qai imatai ni gauna me sivia na 1,000 na iwiliwili ni dautukutuku e Brazil.”

Tekivu mai na gauna qori, e tubu tiko ga na kedra iwiliwili na tacida e Brazil. Ena 2021, e rauta ni 913,479 na levu ni dautukutuku, qai rauta ni 2,184,856 era tiko ena iVakananumi ni mate i Jisu. Na soqo ni veiwasewase ni 2021, e kena ulutaga “Eda Kaukaua Nida Vakabauta!” e vakadewataki ena 15 na vosa, wili kina e 10 na nodra vosa na itaukei.

E uqeti keda dina na nona vakalougatataka tiko o Jiova na cakacaka e Brazil. Dina nira sotava na tacida na dredre ni ka vakalawa, ia na nodra vosota e ivakadinadina ni o Jiova ena vakabulai ira na nuitaki koya.—Aisea 25:9.