E levu na iVakadinadina i Jiova e Brazil era gumatua tiko ni vunautaka na itukutuku vinaka ena vanua ribayawa. Tekivu na cakacaka lavotaki qori ena imatai ni Seviteba, 2018 me yacova na ika31 ni Tiseba, 2019. Ena gauna qo era sa vunau tiko e sivia na le 80,000 na dautukutuku, e tauyavutaki tale ga e sivia na le 16,000 na vuli iVolatabu.

E ikalima ni vanua levu duadua e vuravura o Brazil. E tukuni ni rauta e 28 na milioni na lewenivanua era tiko ena vanua ribayawa. Era le 22 na milioni era tiko tale ga e tauni kei na veikoro. Na cakacaka vakavunau qori e tarai rawa kina e sivia e 1,600 na yalava. Eso na dautukutuku era gole me sivia e 2,000 na kilomita mera vunau kina vei ira na lewenivanua.

E gole e dua na dautukutuku vua e dua na turaga e caka kofi tiko. E kauti dautukutuku sara e nona vale, kacivi watina qai kaya vua: “Daru rogoci koya mada!” E via wasea vei kedaru na itukutuku ena iVolatabu.”

Rau taroga sara na veiwatini eso na taro, me vaka na kedra ituvaki na mate, vuna e vakatara kina na Kalou na veika rarawa, na soli ikatini, iwali ni leqa vakavuvale, kei na levu tale. Levu ni nona kurabuitaka o tagane na isau vakaivolatabu ni taro qori, e kaya vei dautukutuku ni kerea tiko vua na Kalou ena mataka ni siga ya me saumi nona taro kece qori. Ena yakavi tiko ga ya, ratou gole vakavuvale ena soqoni, ratou tomana tale ga nodratou vuli iVolatabu.

Ena dua tale na yalava, era cakacaka vakavunau na dautukutuku ni tau bi tu na uca, era mani vakaruru e valenibula. Era sotava sara e dua na veitinani, ra qai tarogi rau se taro cava rau via taroga vua na Kalou. E kaya o luvena yalewa ni marautaka me raici nona bu tale. Era mani wasea sara na dautukutuku na tikinivolatabu ni veivakaturi, ra vakaraitaka tale ga na vidio e kena ulutaga, The Resurrection—Soon a Reality.

Toso na gauna, ra sikovi rau tale na veitinani na dautukutuku, ratou vuli iVolatabu tale ga vakavuvale. Rau sa gole tiko na veitinani ena soqoni ena siti voleka ga, e tomani tiko ga nodrau vuli ena talevoni.

E yalataka na iVolatabu o ira kece na vakarurugi ena Matanitu ni Kalou, era na robota na yalayala kei vuravura. Na cakacaka vakavunau qori e Brazil, e ivakadinadina ni na vakayacora dina o Jiova nona inaki.—Same 72:8.