Me yacova na yabaki 2023, sa 100 na yabaki na kena tauyavu na valenivolavola ni tabana e Brazil. Ena balavu ni gauna qori, e tubu tiko na kedra iwiliwili na iVakadinadina i Jiova. Qori e vakaraitaka ni vakalougatataka tiko o Jiova na cakacaka e Brazil.

E tekivu na cakacaka vakaitalatala e Brazil ena gauna e veisoliyaki kina na ilavelave ni mekesini na Zion’s Watch Tower kei na Herald of Christ’s Presence ena rauta na yabaki 1900. Levu era taleitaka mera wilika na mekesini qori. Koya gona, ena Maji 1923 e talai Brother George Young o Brother J. F. Rutherford me lai tauyavutaka na valenivolavola ni tabana e Brazil qai tekivuna na cakacaka vakavunau.

E redetaka o Brother Young e dua na ofisi lailai ena siti o Rio de Janeiro, qori sara ga na imatai ni valenivolavola ni tabana e Brazil, e qarava tale ga na cakacaka e Sauca Amerika. E raica tale ga na kena vakadewataka na noda ivola mai na vosa vakavalagi ina vosa vakaPotukali. Ni vakadewataki oti, e lai tabaki sara ena dua na vale ni tabaivola e kea.

Ena 1925, e tomana sara o Brother Young na nona veiqaravi vakadaukaulotu e Argentina, qai lesi o Bother John Rainbow me ovasia ni valenitabana e Brazil. Ena 1926, a vakauta na iTikotiko Liu ni iVakadinadina i Jiova e Niu Yoka mai Merika e dua misini lailai ni tabaivola i Brazil. E rawa kina vei ira na tacida mera tabaka ga na noda mekesini kei na ivola lalai.

Me tekivu ena 1945, era lesi na daukaulotu era vuli mai na Koronivuli e Kiliati mera veivuke na cakacaka vakavunau e Brazil. E vakalougatataka vakalevu o Jiova na sasaga qori, qai tubu na iwiliwili ni dautukutuku mai na le 1,000 ina le 50,000 ena 1948 me yacova na 1968. Ena tolu na yabaki sa oti, era papitaiso e sivia ni le 21,000 e veiyabaki. Me yacova mai nikua, era vakaitavi tiko ena cakacaka vakavunau e rauta na le 900,000 na dautukutuku. Ena vuku ni tubu qo, e vinakati me vakavoutaki qai vakalevutaki na valenivolavola ni tabana. Ena 1980, e tokitaki na valenivolavola ni tabana ina tauni o Cesário Lange, e rauta na 150 kilomita na kena yawa mai na siti o São Paulo. Me tekivu ena gauna qori, e vakalevutaki vakatolu na Peceli e Cesário Lange. Ena gauna qo, era veiqaravi tiko kina e rauta ni sivia na le 1,200 na tacida.

Eda marau nida raica na nona vakalougatataka o Jiova na cakacaka ni veivakatisaipelitaki e Brazil ena 100 na yabaki sa oti.—1 Korinica 3:7.