Ena ika3 ni Tiseba 2023, a vunau o Brother Eduardo Martines e lewe ni Komiti ni Tabana e Brazil, ena kena vakatabui e dua na Vale ni Soqoni Lelevu e Cabreúva, e Brazil. Ena caka kina na veivakavulici vakalou. E sivia ni le 2,400 na tacida era tiko kina, era sema tale ga ena videoconference e sivia ni le 4,900.

Na vale vou qori ena caka kina na vuli ni Koronivuli ni iTalatala ni Matanitu, kei na Koronivuli ni iVakatawa ni Tabacakacaka kei na Watidra. Na kena levu e rawa ni caka kina e tolu na vuli ena dua vata ga na gauna, qai voleka ni le 600 na gonevuli e rawa nira vuli kina e veiyabaki.

Ena 2020, era volia na tacida e dua na otela ra qai vakavinakataka me caka kina na vuli vakalou. Era muria na bolecakacaka na idusidusi me baleta na matedewa na COVID-19, era tara rawa kina e 3 na rumunivuli, 54 na itikotiko, dua na vanua ni kana kei na ofisi. Ni oti ga vakalailai na tarataravaki, e tuvanaki sara na sarasara i kea. Na kena inaki me kilai vinaka kina o ira na lewenivanua ena yasayasa ya, okati kina o ira na vakailesilesi, ira na tacida kei na noda veivakavulici ena iVolatabu. E kaya e dua na vakailesilesi a lai sarasara: “E totoka qai vinaka duadua na tarataravaki oni cakava. E dodonu me va qo na veika eda cakava vua na Kalou.”

O Brother Rogério Braganholo, a veivuke ga ena tarataravaki, e kaya: “E laurai sara ga nona veitokoni o Jiova ena ka kece e tuvanaki me baleta na vale qo. Na nona vakalougatataka na neimami sasaga e dina kina na ka e tukuna na Same 127:1: ‘Ke sega ni tara na vale o Jiova, e matewale na nodra cakacaka kaukaua na matai.’”

Eda marautaka na kena dola na vanua vou qo ni veivakavulici ena iVolatabu, ena vukei ira e levu na tacida e Brazil mera vakavinakataka na nodra kila me rawa nira ‘maqosa ena veivakavulici.’—Taito 1:9.