Tekivu ena ika18 ni Janueri 2020, e yaco e dua na waluvu levu e Espírito Santo kei Minas Gerais, e Brazil ena bi ni uca. E luvu na gaunisala lai vakavuna me vakacacani na vale, ciritaki na motoka, tacavu tale ga na vunikau. Era kaya na vakailesilesi nira tokitaki tale ga e udolu vakacaca na lewenivanua, qai mate e sivia ni 60.

E vakacacani ena waluvu e ciwa nodratou vale na tacida ena rua na taoni o Iconha kei Alfredo Chaves, era tiko kina e 27 na tacida. Eda marau ni sega ni dua e mate se mavoa.

Era bolecakacaka e rauta ni 100 na tacida ena yasayasa qori vei ira na vakaleqai. Era tuvanaka na qase ni ivavakoso na kena wasei nodra cau na mataveitacini, me vaka na kakana, wai kei na isulu. Era veivuke tale ga ena sasamaki kei na kau laivi ni soso ena nodra vale na tacida, wili kina o ira na tiko veitikivi era sega ni iVakadinadina i Jiova.

E sega ni dua na tacida e mavoa se mate. Ia e vakacacani e lima na Vale ni Soqoni, era tokitaki tale ga e rauta ni 50 na vuvale iVakadinadina i Jiova. Eso na tacida era vueti mai ena waqa ena ikarua ni tabavale era tiko kina ni sa luvu na nodra itikotiko. Era veivakaicilitaki na mataveitacini vei ira na tacida era tokitaki yani.

E tauyavutaki na Komiti ni Vakacoko e Espírito Santo kei Minas Gerais me tuvanaka na cakacaka ni vakacoko. Eratou cakacaka vata na Komiti ni Vakacoko, na ivakatawa ni tabacakacaka, kei ira na qase ni ivavakoso ena nodra vukei vakayago, vakayalo tale ga na tacida era vakaleqai.

Meda masulaki ira tiko ga na tacida era vakaleqai ena waluvu. Eda vakavinavinakataki Jiova ni vakarautaki ira na tacida mera vu ni veivakayaloqaqataki, veivakacegui, mera veitokoni tale ga ena veika vakayago.—Same 28:7.