E tuvanaka na Komiti ni Tabana e Brazil e 18 na Komiti ni Vakacoko mera lai vukei kina na tacida era vakaleqai vakailavo ena vuku ni matedewa na coronavirus. Era vukei kina e rauta ni 12,000 na ivavakoso e Brazil, wili kina o ira na tu vakayawa ena loma ni veikau na Amazon. Ena gauna qo era sa ciqoma na ka ni veivuke e 131 na vuvale ena Amazon.

E vakarautaka na Komiti ni Vakacoko e Manaus, na siti levu duadua ena yasana o Amazonas na iyaya ni vakacoko me tauri ira tiko na vuvale me dua na vula. E tiko kina na kakana me vaka na bini, falawa e caka mai na tavioka, raisi, kei na sucu pauta. E vakarautaki tale ga na sovu, pepa ni valelailai, barasi kei na wainimate ni bati. E vakau ena waqa na iyaya qori me lai sobu ena wavu o Manacapuru, oti era sa qai lai veisoliyaka vakayawa sara ena waqa ena so na vanua me vakataki Membeca kei Lago do Castanho.

E tiko o Sister Marinelma ena yasayasa o Lago do Castanho. Ni sa taura na iyaya ni veivuke, e kaya: “Au vakavinavinakataki Jiova ena nona nanumi keitou. E tadre sara ga tu ga na bula ni sega na ilavo. Au vakavinavinakataki ira tale ga na tacida ena nodra lomasavu kei na loloma. Niu talaca tiko na iyaya, e vakaraici au tiko mai o luvequ yabaki ono. Au vakamacalataka sara vua ni vakayagataki ira na mataveitacini o Jiova mera vukei keitou. Tukuna sara o koya, ‘Na, daru masu mada me daru vakavinavinaka vei Jiova.’”

Dua tale na tacida o Brother Jonas Monteiro, ratou tiko vakavuvale ena siti o Caapiranga. Qo eso na ka e vola vei ratou na Komiti ni Vakacoko: “Vinaka vakalevu na nomuni veivuke. Keitou raica na loloma i Jiova ena ka oni cakava. Keitou kalougata dina ni keitou lewe ni vuvale ni mataveitacini e vuravura raraba.”

Era vakalougatataki tale ga na tacida era lewe ni Komiti ni Vakacoko. E kaya o Brother Isaac Emannuel Ramalho de Oliveira, e lewe ni komiti e qase tale ga ni ivavakoso: “Na siga kece au veiqaravi kina ena Komiti ni Vakacoko, au vakila ni vaqaqacotaki na noqu vakabauta. Au kila ni lailai sara na ka au solia vei ira na mataveitacini, ia au vakayaloqaqataki sara vakalevu.”

E vaqaqacotaka dina na noda vakabauta nida raica na sala e tokoni ira tiko kina na nona tamata o Jiova ena gauna ni matedewa qo, se vanua cava era tu kina.—Same 94:14.