Ena ika30 ni Okosita ina ika8 ni Seviteba 2019, e vakayacori e Rio de Janeiro e dua na soqo ni volitaki ivola ena dua na vanua ni soqo lelevu. Era vakaitavi tale ga kina na iVakadinadina i Jiova. Qori e dua na soqo levu duadua e vakayacori e Brazil, e 520 na vanua ni sarasara, era gole tale ga yani e rauta na le 600,000 na vulagi mera lai sarasara. Era vakarautaka na tacida e dua na vanua me vakaraitaki kina noda website, kei na sala mera raica kina na lewenivanua na noda ivola kei na vidio. Na tini na siga qori, era bole e le 258 na tacida mera vakaitavi kina. E veisoliyaki kina e 3,737 na ka eda tabaka.

Na ka e vakarautaki ena vanua ni sarasara e baleti ira sara ga na galu, didivara, kei na mataboko. Era vakaraitaka na tacida na vidio ena vosa vagalu ni Brazil (LIBRAS). Era veitokoni tale ga na dautukutuku era kila na vosa vagalu qori vei ira na gole yani. E kaya e dua vei ira na bolecakacaka: “Ni dua e lako mai ena vanua ni sarasara, ena sega ni rere se madua. Ena tiko e dua me vakamacalataka na jw.org, kei na icakacaka ni vuli iVolatabu.”

E gole mai e dua na qasenivuli kei na vitu nona gonevuli ratou galu. E qoroya sara ga na vidio vagalu me baleti ira na itabagone e tu ena jw.org. E kaya ni so na itubutubu era dau kerei koya me veivosakitaka kei ira na luvedra e galu eso na ulutaga bibi. E kaya o qasenivuli ke ra kerei koya tale ena dua na gauna na itubutubu, ena dusimaki ira sara ga ena website.

E vakarautaki tale ga eso tale na ka ena duidui vosa, me vaka na vosa vakaGuarani, Ticuna, kei Xavante sa tiko ena noda website. E kaya na mata ni iVakadinadina i Jiova o Ricardo Carneiro: “Keimami vinakata mera kila vinaka na iVolatabu na lewenivanua ena nodra vosa sara ga.”

Era uqeti na lewenivanua e Brazil ena soqo qori mera dau wilivola vakalevu, me rawa ni vakavinakataka na ivakarau ni nodra bula. Na vica vata na udolu era gole yani ena noda vanua ni sarasara (jw.org), era wilika na iVolatabu, kei na so tale na ka eda tabaka ena nodra vosa. Qori eso na ka e veisautaka na nodra ivakarau ni bula ena veigauna sa oti.—2 Timoci 3:16, 17.