Sa tekivu vakavinakataki tiko na valenivolavola ni tabana e Brazil, e rauta ni 140 na kilomita na kena yawa ena ra ni siti o São Paulo. E caka na tarataravaki qo me vakalevutaki kina na itikotiko e Peceli, me veisautaki tale ga eso na iyaya ni vale. E sega ni rawarawa toka na vakavinakataki ni valenivolavola ni tabana. Ena vinakati me tuvanaki vinaka me kua ni vakaleqa na cakacaka ena valenivolavola ni tabana. Kena ivakaraitaki, ena vinakati mera vakaicilitaki ena dua tale na vanua na lewe i Peceli ena gauna ni tarataravaki. E namaki tiko ni na oti na cakacaka ena loma ni lima na yabaki.

Na levu ni vanua e vakavinakataki e rauta ni 75,000 na square meter, e okati kina na ofisi kece kei na 650 na rumu mera tiko kina na lewe ni vuvale e Peceli. Na tarataravaki qo ena vakarawarawataka na cakacaka e qaravi ena vale ni tabana. Kena ivakaraitaki, ena biu ena ofisi na lalaga e rawarawa me veisau. Ena vakalailaitaki na valenikuro, ena biu tale ga na vanua ni savasava ena nodra itikotiko. Ena vakayagataki tale ga eso na iyaya vovou vakalivaliva me vakalailaitaka na vakayagataki wai, kei na livaliva.

E vakarautaki ena vale ni tabana na vanua mera vakaicili kina na tacida era veivuke ena tarataravaki. Kena ivakaraitaki, e vakarautaki e 25 na rumu ena dua na tabavale e dau maroroi kina na iyaya mera tiko kina. E veisautaki tale ga e 91 na konteina lelevu e tiko volekata na vanua ni teitei mera vakaicili kina na tacida.

E kaya o Brother Joel Grigor, e veiqaravi ena tabana ni tarataravaki: “Keimami vakadinadinataka sara ga na sala e qarava kina na isoqosoqo i Jiova na cakacaka qo, e vakavulici ira tale ga na nona tamata. Levu na tacida era mai veivuke era sega ni kila na tarataravaki. Ia qo nira sa mai vakavulici sa rawa nira vakavulici ira eso tale.”

Eda vakadeitaka ni o Jiova ena vakalougatataki ira na tacida “era yalorawarawa ni cabori ira” ena tarataravaki qo, kei na tarataravaki ena so tale na vanua.—Same 110:3.