Ena imatai ni Maji ina ika 30 ni June 2024, era cakacaka vakavunau lavotaki e sivia ni le 1,000 na iVakadinadina i Jiova e Brazil. E tuvanaki na cakacaka vakavunau lavotaki qo me veidonui kei na gauna e sevutaki kina na ivola “Marau me Tawamudu,” ena tinikadua na vosa e vosataki ena matanitu qori. E voleka ni le 300 era kerea mera vulica na iVolatabu.

Ni rau veitalanoa tiko e dua na marama e vosa vakaXavante kei na dua na tacida, e tarogi koya sara: “O kemuni sara ga oni dau vakarautaka na vidio ena noqu vosa? Au vaqarai kemuni voli ena dua na gauna balavu. Qo au sa qai kunei kemuni!” Sa qai vakamacalataka ni a vulica tu e liu na iVolatabu kei ira na iVakadinadina i Jiova, e mani cegu nona vuli ni sega ni matata vua na vosa vakaPotukali. Ia ni mai kila na marama qo ni vakarautaki tu na ivola vakaiVolatabu ena vosa vakaXavante, e saga sara ga me vaqarai ira na ivakadinadina i Jiova. E sa tomana tale na nona vuli iVolatabu.

E Santa Maria de Jetibá, a veitalanoa e dua na tacida kei na dua na marama e vosa vakaPomeranian. E rau sota vakatolu ia e duidui na vanua e rau veitalanoa kina. Na ikatolu ni gauna e sikovi koya kina na tacida, e kaya na marama qori ni a masu vua na Kalou ni bera ni rau sota ena imatai ni gauna. E kerea vua na Kalou me vakavulici koya ena sala e dodonu me sokalou kina. E mani ciqoma me vulica na iVolatabu.

Ena dua na koro lailai ena ceva kei Brazil, era sotava na tacida e dua na marama e vosa vakaKaingang e se bera vakadua ni sotavi ira na iVakadinadina i Jiova. E mani wiliki vua na Same 83:18 qai vakamacalataki tale ga vua ni yaca ni Kalou o Jiova. E tarai koya sara ga na ka e rogoca, e tukuna kina ni sega ni dua e se bau vakavulici koya ni tiko na yaca ni Kalou. E mani vakadonuya sara me vulica na iVolatabu.

Eda duavata kei ira na tacida e Brazil, nida marautaka ni levu era sa mai vulica na “itukutuku vinaka tawamudu” e kune ena vosa ni Kalou, me rawa ni da mai duavata ni vakalagilagi Jiova.​—Vakatakila 14:​6, 7.