E rauta ni 1,500 na siti e Brazil e sega kina na ivavakoso, ra qai tiko ena vanua tu yawa. Levu vei ira na tiko kina era se sega ni sotavi ira na iVakadinadina i Jiova. E mani tuvanaka kina na valenivolavola ni tabana e Brazil, na cakacaka vakavunau ena siti qori mai na Seviteba ina Tiseba 2020. Ena vuku ni vakatatabu ni COVID-19, era sa volavola ga na tacida mai na 3,000 na ivavakoso.

Era vaqara na mataveitacini ena internet na siti era lesi kina, ra qai vola na nodra ivola me ganiti ira na tiko e kea. Kena ivakaraitaki, dua na painia e volavola vei ira na tiko ena siti ena yasayasa o Tocantins. E rogoca nira vakaleqai na tiko e kea ena vuku ni kama. E mani vola ena nona ivola na Vakatakila 21:5 qai vakamacalataka na sala ena vakavoutaka kina na ka kece o Jiova, ena vakaotia tale ga na leqa e vuravura. Oti e vica na siga, e sauma lesu nona ivola e dua na yalewa. E kaya ni marautaka na nona wilika na veika ena cakava na Kalou “me vinaka kina na noda bula.” E vinakata na yalewa qori eso tale na kena ivakamacala.

E vakauta e dua na itaukeinivale na nona itukutuku vua e dua na tacida yalewa, qai vakaraitaka kina nona vakavinavinakataka na cakacaka vakavunau qo. E kaya: “Dua na ka na levu ni noqu marau ni vakayagataki iko na Kalou mo vukei au. . . . Vinaka Vakalevu! O vakavuna meu vakabauta tale ni lomani au na Kalou, e taqomaki keitou talega vakavuvale! Au vakila niu lomani. Dina niu sega ni kilai iko, ia o sauma sara ga na noqu masu! Vinaka vakalevu!”

Dua na qase ni vavakoso e Itamarati e Petrópolis, e Rio de Janeiro, e kaya na ka era vakila na tacida ena cakacaka vakavunau: “Vaka ga keimami painia lavotaki ni keimami gole tu ena yalava yawa. Dina ni tu na ituvaki kei na itavi e vale, ia era solia nodra gauna mera vakaitavi vakalevu ena cakacaka qo.”

E vakalougatataka dina o Jiova na cakacaka qo. E ka dokai meda vunautaka na “itukutuku vinaka vei ira na kabuli kece e ruku i lomalagi.”—Kolosa 1:23.