Ena ika10 ni Noveba 2020, e tauca na lewa na European Court of Human Rights (ECHR) ni beca na matanitu o Bulgaria nodra galala ni sokalou na tacida. Na vakatulewa qori ena tomani tale kina na tara ni Vale ni Soqoni ena siti o Varna, e Bulgaria. Sa sivia qo e tini na yabaki na tarovi ni kena tara ena vuku ni veitusaqati. E vakarota tale ga na ECHR me sauma na matanitu o Bulgaria vei ira na tacida e $11,500 na ilavo ni Merika.

Na kisi qo e baleta tiko na vanua me tara kina na Vale ni Soqoni a voli ena Janueri 2006. Ena Me 2007, era vakadonuya na vakailesilesi e Varna me tara sega ni bera nodra veivuke na tacida ena tarataravaki. Ia ena Julai 2007, e tarova na mea na tarataravaki, qai kaya nira sega ni muria tiko na tacida na sala e vakadonui me tara kina na Vale ni Soqoni. Ena vula tiko ga qori e dua na vakailesilesi vakapolitiki e Bulgaria e biuta eso na pousta ena vanua ni tarataravaki, qai uqeti ira e levu na lewenivanua mera vakaduiduile me tarovi kina na cakacaka.

Oti nona tauca na lewa na ECHR, era vakalialiai ira na tacida na vakailesilesi e matanalevu ra tokona tale ga na “vakaduiduile.” E tokona tale ga na mea na veika e caka qori.

Dua na ka nodra veivakaduiduitaki na mea kei ira na vakailesilesi vei ira na tacida. Era kaya nira tarova na tarataravaki ena kena veibataki ga na vanua e tara kina na Vale ni Soqoni, e sega ni veivakaduiduitaki vakalotu.

Sa vakavica nodra volavola eso na tacida ina mataveilewai e Bulgaria wili kina ina Mataveilewai Levu, ia e sega ni rawa. Ena vica na gauna qo, era redetaka tiko na ivavakoso eso na vanua me caka kina na soqoni.

E kaya na ECHR e sega ni ulubale na ka era cakava na vakailesilesi. Ke ra tarova tiko na tara ni Vale ni Soqoni era sa beca na nodra “dodonu ni vakasama, lewaeloma kei na lotu.” Na dodonu qori e volai tu ena Article 9 kei na 11 ena European Convention on Human Rights.

Era nuitaka tu na tacida nira na muria na vakailesilesi ni siti na vakatulewa ni ECHR, me vakadonuya tale ga me tara vakaoti na vanua ni sokalou ena yaga ena itikotiko. Me lagiti tale ga kina na yaca i Jiova ena siti o Varna. Eda vakavinavinakataki Jiova ena nona veitokoni.—Same 54:4.