Ena ika19 ni Maji 2023, e sevutaka o Brother Youssouf Ouedraogo e lewe ni Komiti ni Tabana e Benin, na New World Translation of the Holy Scriptures ena vosa vakaMoore. E caka na kena soqo lavotaki e Ouagadougou na koroturaga kei Burkina Faso. a Levu na tacida ena so tale na siti era sarasara ena internet. E sivia ni le 1,730 era tiko ena soqo. Oti ga na kena sevutaki, e veisoliyaki na kena ilavelave tabaki. Sa rawa ni download tale ga ena iyaya vakalivaliva.

E kilai levu na vosa qo e Burkina Faso, qai rauta ni le walu na milioni era vosataka. E vosataki tale ga e Côte d’Ivoire, Ghana, Mali, Senegal, kei Togo.

Qo na imatai ni gauna mera vakadewataka kina na iVakadinadina i Jiova na iVolatabu taucoko ena vosa vakaMoore. E levu na iVolatabu sa vakadewataki ena vosa qori, ia e sega ni tiko kina na yaca ni Kalou o Jiova.

E kaya e dua na daunivakadewa: “E ka ni sasaga toka na vakadewataki ni so na ivola e volai vakaserekali, me vaka na Vosa Vakaibalebale kei na Sere i Solomoni, ni serekali va ya e sega ni rogo matau ena vosa vakaMoore. Ia ni vakadewataki oti na iVolatabu qo, dua na ka neitou kurabuitaka ni rawarawa sara na kena kilai!”

Eda marautaka kei ira na tacida vosa vakaMoore na iloloma qo mai vei Jiova.—Jemesa 1:17.