Ena ika2 ni Okosita, 2019 e sevutaki ena nodra soqo ni veiwasewase na iVakadinadina i Jiova e Douala mai Cameroon, na New World Translation of the Christian Greek Scriptures ena vosa vakaBassa. E rauta toka e 18 na vula na kena vakadewataki na iVolatabu qori. Qo e imatai ni gauna mera vakadewataka kina na iVakadinadina i Jiova na iVolatabu ena nodra vosa ni vanua e Cameroon.

E vakayacori na soqo ena Vale ni Soqo Lelevu e Logbessou, ra qai tiko kina e rauta na le 2,015. E sevutaka o Brother Peter Canning, e lewe ni Komiti ni Tabana e Cameroon, na iVolatabu ena imatai ni siga ni soqo.

Ni bera ni sevutaki na iVolatabu, era dau vakayagataka tu na tacida era vosa vakaBassa na ivakadewa ni iVolatabu e sau levu qai dredre me kilai na ka e tukuni kina. E kaya e dua na lewe ni timi e vakaitavi ena vakadewataki ni iVolatabu: “Na vakadewa vou qo ena vukei ira na dautukutuku mera kila vinaka sara na iVolatabu. Ena vakatitobutaka tale ga nodra lomani Jiova kei na nona isoqosoqo.”

E rauta ni le 300,000 na lewenivanua e Cameroon era vosa vakaBassa. E le 1,909 na dautukutuku era vosa vakaBassa era veiqaravi tiko ena yalava e qarava na valenivolavola ni tabana e Cameroon.

Keimami nuidei ni na vukei ira na dauwiliwili na donu kei na rawarawa ni vosa e vakayagataki kina, mera kila tale ga ni “bula na vosa ni Kalou.”—Iperiu 4:12.