Ena ika13 ni Tiseba, 2019 e duavata na Mataveilewai Cecere e Chile, ena nona dodonu e dua na tacida ni sega ni via tauri dra ena vuku ni nona vakabauta. E sega gona ni vakadonuya na Mataveilewai Cecere na vakatulewa ni mataveilewai e ra.

Qori nona kisi e dua na tacida yalewa o Polonia Ríos, a sega ni vakadonui me sele ni sega ni via tauri dra. E qai ripotetaka o Polonia Ríos na valenibula e sega ni via qaravi koya vakavuniwai. Ena ika6 ni Okosita, 2019 e vakatulewataka na mataveilewai e San Miguel ni cala o Polonia.

E kerea o Sister Ríos me rogoci tale nona kisi ena Mataveilewai Cecere e Chile, qai rogoci nona kerekere. Qo na imatai ni gauna me vakatulewataka na Mataveilewai Cecere me taqomaka nodra dodonu na uabula era tauvimate, ra qai sega ni via tauri dra ena vuku ni nodra vakabauta. E sivia qo e 25 na yabaki nona lewa tu na Mataveilewai ni sega ni dodonu vua e dua na tauvimate me vakasuka na veiqaravi vakavuniwai ena yaga vua.

Ia qo na ka e kaya na Mataveilewai: “E vinakata o Polonia . . . me bula, me marau tale ga. Ena rawa ga qori ke caka vua na veiqaravi vakavuniwai e waraka tu me tolu na yabaki . . . E tiko na vuna vinaka [e sega ni via tauri dra] kina o Polonia, e sega tale ga ni cata nodratou veiqaravi na vuniwai. Ia ena vuku ni nona vakabauta e sega kina ni via tauri dra. E bibi meda doka nona vakabauta, qori na nona dodonu ni lewaeloma, me rokovi tale ga. E laurai tale ga ena so na ripote ni sega ni yaco e dua na leqa ena veiqaravi vakavuniwai e sega ni vakayagataki kina na dra.”

Eda marautaka kei ira na tacida e Chile na qaqa ni veilewai qo.—1 Korinica 12:26.