Ena ika20 ni Okotova ina ika5 ni Noveba 2023, e vakayacori ena vica na siti e Chile na sotasota ni qito e vakatokai na Pan American Games. Era vakaitavi ena vica na mataqali qito e sivia ni le 6,900 era gole mai na 46 na vanua. E tuvanaki ena gauna qori e dua na vunau lavotaki ra qai vakaitavi kina e voleka ni le 1,500 na tacida. E vakarautaki na qiqi ni vunau qai biu kina na noda ivola ena vosa vakavalagi, vakaPotukali kei na vosa vakaSipeni. Era sotava na tacida e levu na dauqito kei na sarasara era tataleitaki.

E gole ina qiqi e dua na dauqito rogo. E kaya ni se gone, e dau gole ina soqoni kei tinana. E rawaka vakailavo ena gauna qo, ia e sega ga ni vakila na marau kei na lomavakacegu. E vakavinavinakataki ratou na tacida ni ratou wilika vua e vica na tikinivolatabu veiuqeti.

E gole tale ga ina qiqi e dua na ovisa e dau soqoni ni se gone. E kaya ni raici ratou na tacida, e vakasamataka lesu na gauna e dau marautaka kei ira ena ivavakoso. E vakamacalataka vua e dua na tacida tagane na gauna kei na vanua e vakayacori kina na soqoni ena vanua e tiko kina. E soli tale ga vua na iVolatabu kei na brochure Marau me Tawamudu! E kaya na ovisa ni marau ni sa veitaratara tale kei ira na iVakadinadina i Jiova.

E veitalanoa e dua na tacida yalewa kei na dua na goneyalewa yabaki 19. E kaya ni se qai masulaka oti sara ga me dua e vukei koya me kila na iVolatabu. E marautaka me vulica na iVolatabu ena gauna e sureti kina. E tekivu vulica na iVolatabu ena siga tiko ga ya qai vuli vakawasoma me yacova mai qo.

Eda marau vata kei ira na tacida e Chile era vakaitavi ena vunau lavotaki qo. E vakadinadinataki ena veika e rawati kina ni o Jiova ena vakalougatataki ira na vaqarai koya.​—Aisea 55:6.