Tekivu ena Epereli 2021, e yaco na tikoyavavala e Colombia. E sega ni dua na tacida e mate se mavoa. Ia eso na vanua e dredre me voli kina na kakana, karasini, kei na benisini. Era sa vosota tiko na tacida na ituvaki qori, wili kina na veitauvi tiko ni matedewa na COVID-19.

Me rawa nira vukei na mataveitacini, e lesia na Komiti ni Tabana e Colombia e lima na Komiti ni Vakacoko (DRC) mera vakarautaka na ka ni veivuke, ra muria tale ga na vakatatabu ni COVID-19. Era sa veivuke tiko na mataveitacini, vakabibi na voli ni kakana. Era veivakacegui tale ga vakayalo na qase ni ivavakoso, kei na ivakatawa ni tabacakacaka vei ira na tacida.

E kaya o Brother Almond Winklaar, e veiqaravi ena tabana ni vakacoko: “Dredre dina na ituvaki keimami sotava. Ia au vakavinavinakataki Jiova ni vakayagataki ira na tacida mera vukitotolo, ni vukei keimami ena gauna dredre qo.”

Ena iVavakoso e La Loma Arena e voli na kedra kakana e 18 na dautukutuku, kei na nodra vuvale. E kaya e dua na veiwatini painia: “Dua na ka neirau marau ni keirau ciqoma na ka ni veivuke mai na Komiti ni Vakacoko. E saumi sara ga na neirau masu. Keirau vakavinavinakataki ira na tacida nira vakarautaka na ka keirau gadreva. Keirau vakavinavinakataki Jiova tale ga ni solia na kaukaua me rawa ni keirau vosota.”

Era qoroya eso era cakacaka ena sitoa e voli mai kina na ka ni veivuke, na cakacaka ni vakacoko eda qarava. E kaya e dua vei ira: “Au dau kila tu ga ni o ira na iVakadinadina i Jiova era gole mai vale mera vunau. Ia au qoroya vakalevu nodra vukei ira na vinakata tu na veivuke.”

Dina nira sotava na tacida na ituvaki dredre, ia e dei tu ga nodra ituvatuva vakayalo. Eda kila ni o Jiova ena vakarauta tiko ga na ka vakayago era gadreva, kei na ka vakayalo nira “sega ni vakavuravura.”—Joni 17:16.