ME 30, 2023
COLOMBIA
Na Ofisi ni Vakadewa Vou ena Vosa vakaWayuunaiki
Ena ika18 ni Maji 2023, e vakatatabutaki ena siti o Riohacha e Colombia e dua na ofisi ni vakadewa tu yawa ena vosa vakaWayuunaiki. Era vosataka na vosa qori e rauta ni 700,000 na lewenivanua e Colombia kei Venezuela.
E liu e dau redetaki e rua na vale mera vakayagataka na daunivakadewa. Ia e dau leqa na livaliva, na talevoni kei na Internet qai ka lailai tale ga na vale. E mani volia na valenivolavola ni tabana e Colombia e ono na tabavale me vakayagataki me ofisi ni vakadewa tu yawa, mera vakaitikotiko tale ga kina na tacida era veiqaravi. E vakadonui na cakacaka qo ena Okotova 2022 qai mai vakaoti ena Janueri 2023.
E vakamacalataka o Brother Juan Felipe Rodríguez e veiqaravi ena tabana ni tarataravaki na veika me baleta na ofisi vou. E kaya: “E biu kina na misini vovou ni katokatoni, e vakarautaki vinaka tale ga na vanua mera cakacaka kina na daunivakadewa, e totolo na Internet qai dua na kena idini ni livaliva (generator).”
E tekivu vakadewataki na noda ivola ina vosa vakaWayuunaiki ena 1998. Era veiqaravi tiko ena tabana ni vakadewa e 14 na tacida. Era veiqaravi e rauta ni 400 na dautukutuku ena 20 na ivavakoso vosaWayuunaiki.
Eda marau nida raica na sala e vukei ira kina na duivosavosa na isoqosoqo i Jiova mera “toro voleka vua na Kalou.”—Jemesa 4:8.