Ena Sigatabu na ika26 ni Maji 2023, e vakayacori ena siti o Cali e Colombia e dua na noda soqo e rogoci kina na ivunau ena vica na vosa. Qo se qai imatai ni gauna, e vakadewataki kina na soqo ni tabacakacaka vakaSipeni ina vosa vakaGuambiano kei na vosa vakaEmberá (Chamí). Era tiko kina e sivia na le 1,600. E wili tale ga kina na le 48 era vosa vakaGuambiano, kei na le 78 era vosa vakaEmberá (Chamí).

Era tiko e Colombia e sivia na le 21,000, e nodra vosa ni vanua na Guambiano qai sivia na le 77,000 era vosa vakaEmberá (Chamí). E liu, e sega ni tu ena Vale ni Soqoni Lelevu e Colombia na misini e dau vakayagataki me vakadewataki na porokaramu ina so tale na vosa. Koya gona, e sega ni dau matata vei ira eso na gole ena soqo ni tabacakacaka vakaSipeni na veika era rogoca.

Nira rogoca na vuvale ni na vakarautaki na soqo me baleti ira, era tekivu maroroi ilavo me rawa nira gole kina. Ratou cakava qori na le 8 ratou lewenivuvale na Carrasco. E yawa sara na vanua ratou tiko kina. E vinakati me ratou taubale me 3 na aua, qai 12 na aua nodratou vodo basi. Ia e sega ni vakayalolailaitaki ratou qori. Ratou tekivu vakavakarau ni se vo tu e vica na vula. Ratou cakava eso cakacaka ni liga qai volitaka me rawa kina na nodratou ivodovodo. E papitaiso ena soqo ni tabacakacaka qori na luvedrau tagane yabaki 12 o Henry. E dua vei rau na le rua rau papitaiso rau vosa vakaEmberá (Chamí). Rau papitaiso tale ga e le rua na tacida rau vosa vakaGuambiano.

E veivuke o Sister Adrianin Morales, me vakadewataka na ivunau ena soqo ina vosa vakaGuambiano. E kaya: “E marautaki dina ni vakarautaki e dua na soqo e rogoci kina na noqu vosa. O ira kece na tiko ena soqo, era na rogoca na vosa i Jiova ena nodra vosa ni sucu.”

E vakaitavi tale ga ena vakadewa o Brother Diomedes Velasco, e kaya: “Au lomaleqa sara ga ena gauna au lesi kina ena itavi qo. Ia e vakayaloqaqataki au noqu raica na veika e cakava tiko o Jiova vei keimami e duatani na neimami vosa. E itavi dokai gona niu rawa tale ga ni mai veivuke.”

Eda marau nida rogoci ira na duivosavosa nira kaya: “Ni lako mai meda lai cabe ina ulunivanua i Jiova.”—Aisea 2:3.