Ena ika7 ni Janueri 2024, e sevutaka o Brother Jules Bazié, e lewe ni Komiti ni Tabana e Côte d’Ivoire, na ivola The Bible​—The Good News According to Matthew ena vosa vakaYacouba. Era tiko ena soqo qori na le 302, era sema ena iyaya vakalivaliva na le 257. E sevutaki na kena katokatoni, qai rawa tale ni download ena iyaya vakalivaliva. Ena qai veisoliyaki malua na kena ilavelave tabaki.

Era tiko e Côte d’Ivoire, Guinea, kei Liberia e rauta ni le 1.5 na milioni era vosa vakaYacouba. Era veiqaravi e Côte d’Ivoire e rauta ni le 254 na tacida ena va ivavakoso kei na ono na iwasewase lalai vosa vakaYacouba

E se bera vakadua ni vakadewataki taucoko e dua na iVolatabu ena vosa vakaYacouba. E rua na ivakadewa ni iVolatabu vaKirisi ena vosa vakaYacouba. Ia e sega ni kune kina na yaca i Jiova, qai vakayagataki ena iVolatabu qori na vosa dredre. Era marau gona na lewenivanua mera wilika na ivola The Bible​—The Good News According to Matthew ni matata qai rawarawa me kilai. E kaya e dua na tacida tagane: “E liu, keimami dau wilika vakamalua eso na tikinivolatabu me rawa ni kilai na kena ibalebale. Ena so na gauna keimami na wilika vakavicavata. Ia qo keimami marautaka na ivakadewa vou qo ni ivola i Maciu ni matata na vosa e vakayagataki kina!”

Eda vakavinavinakataki Jiova ni solia vei ira na tacida vosa vakaYacouba na iloloma ena uqeti ira mera ‘vakaliuca na nona Matanitu.’​—Maciu 6:33.