Ena ika20 ni Janueri 2024, e vakayacori e dua na soqo ena Vale ni Soqoni Lelevu e Guanabacoa e Havana, e Cuba. E sevutaki kina na ivola i Maciu kei Marika ena vosa vagalu ni Cuba. Ni sevutaki oti ga, sa rawa ni download ena jw.org.

E rauta ni le 53,000 na didivara era tiko e Cuba. Ena itekitekivu ni 1990, e sagai me vunautaki na itukutuku vinaka vei ira na didivara era tiko e Cuba. Ena 2011, e sevutaki na imatai ni ivola vakaivolatabu ena vosa vagalu ni Cuba. Nikua, era veiqaravi tiko e le 756 na mataveitacini ena 28 na ivavakoso vosa vagalu, kei na 10 na iwasewase lalai e Cuba.

Qo na imatai ni gauna me vakadewataki ena vosa vagalu ni Cuba na ivola i Maciu kei Marika. E kaya e dua na tacida yalewa: “Na vakadewa ni Marika 7:​32-37 me baleta nona vakabula o Jisu na tagane didivara, e tara sara ga na lomaqu e vaka sara ga me cakava tiko qori vei au o Jisu! E tara sara ga na lomaqu. Au sa raitayaloyalotaka sara ga na bula ena vuravura vou. Vinaka vakalevu!”

Eda marau ni na yaga vei ira na tacida vosa vagalu e Cuba na iloloma totoka qo. Eda nuidei ni yaga tale ga vei ira e levu tale me rawa nira lomani Jiova ena ‘lomadra taucoko, nodra vinaka taucoko kei na nodra vakasama taucoko.’​—⁠Marika 12:⁠30.